KUCHING: Menteri Besai, Datuk Seri Anwar Ibrahim deka nempa kerejasama ti tegut agi enggau Premier Sarawak, Datuk Patinggi Tan Sri Abang Johari Tun Openg ngambi ulih mai Malaysia ngagai tikas ti tinggi agi sereta ulih besemekih enggau menua maju.
Ku iya, kebuah pia laban tuai lumur satu Sarawak nya siku mensia ti ransing enggau jauh tinjau lalu udah mujur ngangkatka menua nya sereta maju kelebih agi bekaul teknologi sereta kuasa gadung.
“Lebuh baum ba Putrajaya, aku madah menua kitai udah tinggal ari pekara ti dikereja enggau dipejalai Premier Sarawak ba sekeda pekara baka teknologi gadung, hidrogen, amonia enggau ke bukai.
“Tu meh pemansang Sarawak berekat pengeransing tuai iya.
“Abang Johari udah mai wilayah tu ngagai tikas ti nyulut agi ari nengeri bukai di Malaysia.
“Nya kebuah aku enggau temegah ati madah deka nanggam kaul kerejasama enggau Abang Johari ngambi ulih mai ukai semina Sarawak, tang mega Malaysia ngagai tikas ti tinggi agi enda lama agi,” ku iya.
Anwar nibar jaku nya ba Pengerami Makai Lemai Gawai Dayak 2023 Sarawak ditu, malam ensanus.
Iya mega muji Perintah Gempung Parti Sarawak (GPS) laban mujur ngetan pemanah kaul, pemujur sereta penyerakup komuniti raban bansa ba wilayah tu.
