Sejam setengah merau nganjung bantu ngagai Kpg Bungan

SIBU: Bantu pemakai maya Atur Mindah Betagang Belebas (PKPB) udah dianjung ngagai peranak Kampung Bungan Kecil dan Kampung Bungan Besar, ditu kemari.

Senator Robert Lau Hui Yew madah, dua genturung pendiau nya jauh ke ulu, ba pala menua Dun Bawang Assan.

“Dua buah genturung pendiau nya endang bedau datai jalai tang semina ulih dilawa nengah jalai ai.

“Nya kebuah bala kami nganjung bantu pemakai nya ngena perau panjai ngelayang Batang Igan urung sejam setengah pejalai,” terang Lau.

Lau ngarapka bantu nya ulih meri pemaik ngagai ruang bilik ba sitak nya ke alai lebih ari 200 iku peranak ba dua buah genturung pendiau nya.

“Aku ti mega Chairman SUPP Bawang Assan meri besai terima kasih ngagai Perintah Sarawak laban udah nganjung enggau ngagihka bantu pemakai tu.

“Aku nemu, ukai mudah bala volunteer kami nganjung pemakai jauh ngagai menua ulu baka dua buah genturung pendiau nya.

“Tang tu endang tanggung pengawa kami lalu kami berasai lantang ati laban bantu tu udah dianjung ngagai dua buah genturung pendiau nya enggau likun,” terang Lau.

Suara Sarawak