Sejarah Batu Asah diintu meruan

ROBAN: Taba sejarah Batu Asah deka dikemanah enda lama agi.

Adun Kalaka, Datuk Abdul Wahab Aziz madah, entara perambu nya nyengkaum ngaga jalai alun meruan agi ngelawa taba nya ari menua Plassu.

“Semua utai tu (keretas kereja) deka digaga piak Opis Kaunsil Pelilih Saratok (MDS).

“Perambu tu mega deka dibai ngagai aum komiti pengatur pengawa MDS udah tu,” ku iya.

Nambah nya ku iya, pengawa minta raban pengelicha Universiti Malaysia Sarawak (Unimas) bejalaika pansik endur nya mega udah dianjung taun nyin tadi.

“Kitai dekaka sida mansik pasal sejarah Batu Asah, Pendam Melayu (Islam) enggau Pak Pendam ke bisi ukir dipelaba datai ari menua Aceh, Sumatera ke diempu peranak Perabangan dikumbai asal ari Sibu,” terang iya.

Wahab mansutka jaku nya lebuh dirandau pemberita ba Program Bejalai Bebala Mayuh ngelawa Taba Sejarah Batu Asah ba Plassu, Roban apin lama ke udah.

Ungkup penerang, Batu Asah kedua bali nama dikumbai Batu Galang tu dibai siku pemesai Sultan Brunei benama Sharrif Masahor lebuh iya dipadu gawa ngumpul chukai ari mensia mayuh sebedau ngelarika diri ngagai menua Singapore nengah jalai tasik ari Kuala Rajang.

“Ngarapka langgur deka ngemanahka penyikap perengkaguna taba nya mujur dipejalai laban tu sebengkah ari endur ngembuan jerita lama ditu.”

“Enti enda diintu ari diatu, aku irauka rebak dudi deka enda ngelala sejarah menua sida empu ila.

“Sentang agih belanja ungkup pengawa tu datai ari Opis Menteri Dagang Temuai, Seni, Main Asal lalu MDS semina menggi tanggungpengawa matau enggau ngelanggur aja,” ku iya.

Sama datai ngulu pengawa sehari nya bala ketuai raban bansa ari Pelilih Kabong, Roban enggau Saratok sereta bala staff MDS.

Suara Sarawak