Sejarah Bukit Baya di Saratok

INFO
Bepalan enda jauh ari Simpang Bajau kira penyauh 25 kilometer ari pasar Saratok

Jeman kelia maya menua agi latung, kitai Iban endang sigi bepanggai ba pengarap beburung sebedau ngemun sebarang pengawa baik bumai betaun enggau kereja bukai.

Enda tinggal mega ngagai peranak menua Emplaie, Saratok endang ngembuan mayuh bekau palan, bekau jari ketuai iban dulu kelia.

Apin lama, penulis bisi mai kitai sebuat bela sama nengkila pemun jerita asal sebuah rumah lama digelar ‘De Konjourieng’ ti selalu dikumbai orang rumah berantu ba Simpang Rumah Panjai Orang Kaya Temenggong Tandok, Krangan.

Nya alai serak tu, penulis sekali agi nyerungkai cherita lama dikunsika enggau bala pemacha pasal palan sejarah ti bisi ba menua Saratok iya nya palan alai dua iku baya digaga ari tanah (engkeramba baya) ke beumur lebih seratus taun.

PENYANDING PENEMU….Kabi Entering 85 taun,siku ari orang pemadu tuai ti agi nguan menua Emplaie diatu alai penulis ngenukuka pengamat sejarah baya.

Tuju tu mega, ngambika rurun penemu enggau pemun penyadi siti-siti bekau palan tauka bekau jari orang dulu menya enda punas ari perening sida nembiak rebak baru, lebih agi ungkup rebak baru genturung menua besemak.

Mulai ngagai pun kenang, nyadi pun cherita baya tu menya bekau ari penusah padi ke balat bendar diseruga ‘utai’ maya bumai sereta peranak menua mega balat dituntung penyakit bejangkit ti balat bendar nyadi lalu sekeda bisi naban ke nyawa.

Kepuas nguji mayuh macham chara dikena mutar penanggul datai nekul, enda mukai-mukai dia deh siku bujang berani benama Lipa Anak Kutok (niang) maya nya bisi bemimpi diasuh antu ngaga baya dikena ngemba (makai) semua antu kudi ke balat nyeruga pengelikun menua enggau utai tanam peranak menua maya nya.

Enda beleman dia deh Lipa enggau bala bukai besemak genturung menua lalu ngaga baya siku keterubah, iya nya baya lelaki urung taun 1820-an.

Nya alai, palan tu diatu dikumbai orang Bukit Baya enda jauh ari Simpang Bajau kira penyauh 25 kilometer ari pasar Saratok nyentuk ke sehari tu.

PAK TANDA….Penerang ngelansa ungkup mensia mayuh ti bisi mansa palan nya digaga MDS.

Pengudah penembu baya lelaki nya digaga, penanggul peranak genturung menua maya nya endang amat bisi belinsur suman. Bumai betaun bulih padi lalu pia mega enggau jelu tupi nadai utai ngeruga agi.

Tang enda memukai, nyau kelama udah nya dia deh Lipa bemimpi baru.

Ba mimpi nya, Lipa dipadahka baya lelaki (baya keterubah) enda tetangkupka tanggungpengawa makai antu kudi (alah ayu) ba genturung menua nya laban pemayuh sereta genturung menua dijaga iya (baya) kelalu besai.

Ninga jaku padah ari baya lelaki dalam mimpi nya tadi,Lipa lalu ngasuh siku agi bujang berani peranak menua benama Sat anak Seman (niang) ngaga siku agi baya nyadi ‘pemantu’ ngagai baya keterubah tadi.

Laban baya keterubah digaga baya lekaki,nya alai sida sebuat lalu setuju ke sempekat bala mayuh ngaga baya indu ngerimbai baya lelaki nya tadi. Baya indu tu digaga urung taun 1830-an.

Penembu baya indu (baya ke dua) nya tadi, peranak genturung menua Emplaie baka dibuai empeleman.Bumai betaun bulih padi,betanam betupi nadai utai ngachau agi nyentukka seharitu.

Nya alai, enti bala pemacha mayuh bekenaka perengka pengangkut ari Saratok, apin datai ba Simpang Bajau mua ari kiba kitai (ari Saratok) dia kitai ulih meda bisi papan tanda bechura biru ti digaga piak Opis Kaunsil Pelilih Saratok (MDS) ke nandaka bukit alai palan baya tu digaga.

Kelimpah ari nya mega, Palan Bukit Baya tu udah direjista nyadi siti ari Palan Pesaka Dunya kenaka taun 2009 suba.

Minta ampun ngagai bala pemacha mayuh laban enda ulih ngadaka gambar baya dua iku tu ketegal maya penulis ngelawa palan nya apin lama kamera penulis nemu enggai nyadi dikena begambar tauka ngaga ulah maya ba tuchung Bukit Baya apin lama.

Suara Sarawak