Sejarah lagu menua Sarawak

Sejarah lagu menua Sarawak

GENAP menua ti merdeka tentu bisi lagu iya empu ti nyadi lambang pengelantang menua udah megai perintah kediri.

Enda tinggal mega Sarawak Tanah Kenyalang ti nitihka sejarah bisi tiga buah lagu ditengkebang dikena nunjukka bansa Sarawak chukup talukka menua.

Nyentuk seharitu, Sarawak agi bepegai teguh enggau bebasaka penatai asal, pengarap enggau daya idup pupu bansa tinguan menua tu.

Lagu Sarawak berengkah ari sejarah menua dibaruh pegai Rajah Brooke nyentuk kitai begempung enggau tiga menua bukai numbuhka Gempung Malaysia.

Rambai perintah dipegai Rajah Ketiga iya nya Rajah Charles Vyner Brooke, Negara Sarawak bisi lagu kediri diberi nama Fair Land Sarawak.

Rajah Charles Vyner Brooke endang angkunka litaricha enggau muzik udah minta sebuah lagu ditengkebang.

Leka lagu Fair Land Sarawak ditengkebang F.C Ogden, siku bansa Eropah ti mega bakih Rajah C.V Brooke empu.

Tiun lagu tu diambi ari sebuah lagu orang ribai ti benama Gone Forth Beyond The Sea.

Lebuh Sarawak dipegai Perintah British Borneo, lagu menua tu mega agi ditebah ba pengawa besai Perintah Sarawak kelimpah lagu God Save The Queen.

Pengudah Gempung Malaysia ditumbuh lalu Sarawak nyadi sebagi ari menua numbuhka iya dalam taun 1963, kabinet keterubah Sarawak betuaika Kepala Menteri keterubah, Stephen Kalong Anak Ningkan, bejalaika inisiatif ngemanahka tusun lagu menua Fair Land Sarawak nya. Ungkup pengawa tu, siku penengkebang lagu (composer) benama George R.K Freeth, lebuh nya udah dipinta nusun baru tiun lagu nya.

Lagu Fair Land Sarawak tu meruan dikena nyentuk iya ditukar enggau lagu baru dalam taun 1973.

Lagu Fair Land Sarawak tu mega ukai semina disada dalam Jaku English ti nyadi jaku asal iya tang bisi ditulis dalam Jaku Iban lalu leka lagu digaga Abang Ujai. Lagu Menua Sarawak dikumbai Fair Land Sarawak disada dalam taun 1946 nyentuk 1973.

Dalam taun 1973, Lagu Menua Sarawak iya nya Fair Land Sarawak udah ditukar ngena lagu baru diberi nama Sarawak Bahagia ti dikena nyentuk taun 1988.

Beserimbai enggau ngintu genap taun ke-25 Sarawak merdeka ari pegai Koloni British, Perintah Sarawak udah bejalaika inisiatif nukar lagu menua Sarawak Baha gia ngagai sebuah l a g u baru. Leka lagu baru nya dikarang komposer anak Sarawak empu, iya nya Allahyarham Dato’ Haji Wan Othman enggau Ismail Hassan seraya tiun digaga Allahyarham Dato’ Haji Wan Othman empu.

Lebuh nya mega, Sarawak Tanah Kenyalang udah nukar tambai menua lalu lagu Menua Sarawak ke baru diberi nama Ibu Pertiwiku enggau tambai nya meruan dikena nyentuk sehari tu.

Tu sekeda lansa lagu menua Sarawak ti udah dikena ari taun 1946 nyentuk diatu.

Dikearap penerang dikunsi Suara Sarawak serak tu deka nyadi malin enggau penemu ngagai sida ti enda ngelala lagu menua kitai suba.

Kenang mih sejarah menua kitai ngena basa laban genap leka lagu ti ditengkebang endang bisi reti ngagai kitai ke nyadi anak Sarawak, bansa Sarawak.

 

Suara Sarawak