Sejarah pemungkal menua Perpat, Kabong

Tulin sebaka enggau ripih tusun rumah ba Kampung Melayu,baka nya meh gaya tusun rumah bansa kitai Iban terubah iya maya berimba ba menua Perpat kelia.

Entara anak Iban ke dicherita nyadi pemungkal berimba tauka dulu ngerumpang menua tu menya iya nya sida Junit anak Indit,Gindan anak Mut,Enchana anak Seman,Nyaring anak Seman,Bejie anak Awal,Linggih anak Aman,Unting anak Ampi,Nyuin anak Ampi,Sigi anak Ampi sereta Upal anak Kam 78 taun.

Diatu semina tinggal Upal aja, ari sida ti mungkal menua tu agi gayu lalu ampit datai jari sama enggau berimba sereta mungkal menua nya urung taun 1948 kelia.

Peranak rumah panjai Perpat tu kelia ngentak sereta dibatak Upal anak Kam urung taun 1966 pengudah pengelama sida sebuat diau ba berumah kediri-kediri (Berumah Nyembuah) ari taun 1963 lalu diiring sereta diembing TR (Niang) Banggai anak Junit enggau penyampau empat pintu bilik maya nya.

PEMATAK BERUMAH…Upal Kam (kiba) begambar enggau siku peranak serak ke-2 Rumah panjai Perpat Atas Aire Gindan (kanan).

Umur rumah panjai

Diatu nyau udah manggai 57 taun diau mendam ba menua Perpat sereta mega mengkang ngereja pengawa lama bansa Iban baka bumai betaun enggau betupi.

Tu mih batang pengawa dikena peranak menua tu ngidupka diri sereta betuaika Tuai Rumah (Tr). Tanjung anak Nyuin kenyau ari taun 2000 sereta ngembuan penyampau 13 pintu bilik lalu bisi urung 300 iku peranak dipegai iya diatu.

Taja umur rumah panjai Perpat diatu nyau serebak enggau penyampau taun pengelama Sarawak udah merdeka dalam Malaysia, tang Perpat agi balat kelalu jauh tinggal pemansang.

Ari perati semua sukut pemansang ti patut iya udah ulih diasaika genap iku peranak menua tu ti benama rayat Sarawak tauka Malaysia.

AGI NGENA TANGKI….Taja udah datai ba jeman moden tang agi nimbun ai ujan ambika kena sehari-hari.

Rumah Tanjung Nyuin,Perpat Atas mega kengka iya rumah panjai ba menua tu lalu dipegai ba baruh kuasa Opis Pelilih Kabong tu mega mengkang bepanggai ba ai ujan (ai timbun ngena tangki septik).

Tu mih ai dikena sida beridup besehari-hari sereta apin bisi jalai alun ti meruan laban kelalu chukup pedis ditujah ngena perengka pengangkut ti mit.

Taja pia seninjik udah bisi nerima bekal kuasa karan ari perintah nengah SESCO empat taun ke udah iya nya ba taun 2015 suba.

Kelimpah ulih mega dilawa nengah jalai ai ngena perau tambang nyemberai ari penyangkai perau Lubok Nibong.
Siku orang pinchin gawa perintah, Aire Gindan 60 madahka,gaya pendiau enggau pengidup mensia mayuh ditu (Perpat) diatu endang agi randaka pemansang ari perintah besai.

“Chukup sinu ngenang pemedis,pengemar enggau penanggul ti ditapi peranak Perpat diatu.

REPUK…Gaya jelatung penyangkai perau dikena peranak Perpat nurun undur begiga ninting hari.

Agi randaka pemansang

“Genturung menua tu ditu mega apin bisi nerima bekal ai beresi sereta lalu apin bisi jalai alun ke meruan ungkup guna mensia mayuh lebih agi peranak rumah panjai Perpat Atas.

“Nya alai,kami peranak Perpat Atas ditu endang seruran minta perening minta iching perintah besai berari ngicha ngambika ulih berunding sereta merening penusah ti ditapi kami ninting hari sejeman jeman kenyau ari 57 taun ke udah.

“Pia mega,besai pengarap peranak menua ditu mega deka sama ulih lalu ampit ngasaika pemanis buah pemansang asil ari Sarawak merdeka dalam Malaysia.”ku Aire Gindan.

Aire siku ari sekeda peranak renggat ke-2 Rh.Tanjung,Perpat Atas maya dirandau pemberita lebuh ngelawa rumah panjai sida apin lama ke udah.

Ungkup penemu,Rh.Tanjung,Perpat Atas tu mega kengka iya rumah panjai bansa Iban ti bisi nampil besemak sereta nyelat pendiau bansa bukai (menyadi kitai bansa Melayu) ba genturung menua tu.

SUNGAI SEBLAK….Peranak Perpat agi ngemeranka perengka pengangkut perau tambang dikena ngelayang Sungai Seblak.

Lansa kenang sejarah tu dikenuku ke penulis enggau Upal Kam 78,maya randau ngerampas nyerumba sida serumah bisi nerima penatai temuai (Karoling) ari gerija besemak sehari nya.

Lalu pia mega ngarapka piak perintah ulih chakah agi bejalai ngabas lalu betemu sereta ngerandau rayat menua pesisir.

Nitihka sebana sekeda peranak menua nya, ukai semua rayat menua pesisir nemu tungga kuing alai nganjung peminta ke mega mayuh entara sida agi bebagi ati sereta agi malu tauka nangi lebuh mantaika penyuntuk enggau penanggul lebuh ngenatai kediri ba opis tauka ejensi perintah.

Beserimbai enggau pengerami Krismas ke deka datai tu, Upal ngarika Peranak Rh Tanjung Perpat Atas, meri Selamat Hari Krismas nuju semua raban Kristian ti deka ngintu Krismas enggau selamat Taun Baru 2020 nuju semua anak Sarawak di selampur nengeri.

“Arapka semua kitai terus segulai sejalai ngintu pengerami Krismas taun tu sereta muntang agi minta pemansang ari perintah ba taun ti deka datai.

“Aku besampika semua kitai lantang senang sereta nerima berekat ti belimpah ari Tuhan ti bekuasa, ‘Merry Christmas’ enggau Selamat Taun Baru,” ku iya ngujungka randau seraya ngarapka perintah berati lalu lengkas agi mai buah pemansang ngagai rumah panjai sida.

ENDA LIKUN…Jalai darat nuju Rumah panjai Tanjung Perpat Atas.