KUCHING: Berita negatif ke dikerembai ba media rama entara kebuah sekeda raban nembiak nyadi takut tauka enggai nerima vaksin Covid-19.
Menteri Muda ba Opis Kepala Menteri (Pekara Islam enggau DBKU), Datuk Dr Abdul Rahman Junaidi madah, penerang ke enda betul udah ngasuh raban nembiak irau ati sereta nangi lalu bisi sekeda nembiak takut jerumat.
“Bisi kedua enggai nerima vaksin engka nitihka apai indai sida ke enggai nerima vaksin.
“Enti nitih, kebendar kitai rayat Malaysia udah nerima vaksin kenyau ari mit dikena nambahka pengetan batang tubuh,” terang Abdul Rahman.
Iya mansutka jaku nya lebuh ngelansa pasal bisi sekeda nembiak enggai nerima vaksin Covid-19.
Abdul Rahman ke mega Menteri Muda Utiliti (Bekal Ai) madah, enti nitih raban nembiak enda tau nulak vaksin laban nya ulih nambahka pengetan tubuh ngelaban igi penyakit.
“Enti ulih terima mih vaksin baka ditetapka perintah laban nya ulih ngasuh kitai nadai penangi ngereja pengawa baka selama.
“Baka ba menua luar, mayuh nembiak beumur 13 taun bebadi nyawa ketegal Covid-19,” ku iya.
Nya alai ku iya, semua serap komuniti mesti bejejaga laban Covid-19 ulih ngerampit semua serap umur.
