KOTA SAMARAHAN: Perintah Besai numbuhka Unit Betanam Betupi Moden dikena ngenegapka penau betanam betupi dalam menua kelebih agi Sabah enggau Sarawak.
Menteri Kereja Raya Baru Bian madahka unit nya deka diketuaika Menteri Besai Tun Dr Mahathir Mohamad empu.
“Unit tu ditumbuhka dua minggu ke udah lalu dibaruh pegai Opis Menteri Besai.
“Dua minggu ke udah, kabinet udah meri pemutus unit khas ditumbuhka ngambika meri fokus ngagai pengawa moden dalam sektor betanam betupi selampur Malaysia,” ku iya.
Baru empu deka nyadi volunteer meri sanding penemu ngagai unit nya.
“Aku madahka Dr Mahathir Sarawak enggau Sabah ngembuan pengulih besai ba pengawa betanam betupi.
“Menteri Besai empu udah besetujuka pekara tu,” terang Baru nyentuk agi.
Baru madah munyi nya ba aum pemberita pengudah bejadika Opis Servis Komuniti Parti Keadilan Rakyat Pampang Kota Samarahan, Dun Stakan ditu tadi.
