Sektor kerebau diangkat nyadi ekonomi besai di Limbang – Uggah

LIMBANG: Perintah GPS ngemendarka agih belanja penyampau RM6 juta dikena ngemansang enggau ngenegapka agi industri kerebau di Bagi Menua Limbang.

Sapit Kepala Menteri Datuk Amar Douglas Uggah Embas ngemendarka agih belanja nya lebuh iya bejadika Pengerami Babalung ke-16 ditu, kemari.

Uggah ti mega Menteri Betanam Betupi Moden, Tanah Adat enggau Pemansang Kandang Menua ngarika Kepala Menteri Datuk Patinggi Abang Johari Tun Openg rambau atur pengerami nya.

Ku iya, Bagi Menua Limbang endang asal nyadi palan pemansut besai kerebau menua tu.

“Ba taun 2000, bisi lebih 12000 iku kerebau di Limbang.

NYADI PERANSANG… Uggah nyuaka perais ngagai pemenang lumba kerebau biak rambau Pengerami Bebulang, Batu Danau, kemari.

“Lalu diatu penyampau nya udah nurun ngagai urung 5,500 iku.

“Abang Johari dekaka penyampau nya nambah lalu kami deka bejalaika pengawa tu chara berenggat,” ku iya nerang.

Pia mega ku Uggah, pengawa tu deka berengkah enggau bejalaika polisi makai rumput dalam timpuh dua taun deka datai enggau nyeleti pagar.

Udah nya kami deka ngemai anak kerebau enggau bejalaika teknologi moden dikena nentuka penyampau anak kerebau ti ada manah agi.

“Aku udah ngelawa menua Darwin, Australia ba pun taun tu tadi ngambi beratika pengulih betupi dedin.

“Aku temegah ati meda utai ti bisi dipeda, sekeda kerebau lelaki 800 kg pemerat dibanding enggau kerebau pemadu besai dikemisi kitai semina 350 kg aja.

“Kitai deka ngemai teknologi nya kitu ngambika dikena di menua tu sereta ulih mansutka pemesai kerebau baka nya,” ku iya.

Ku iya, kerebau endang sepenuju enggau pengidup, gaya idup enggau chara lama orang Bisaya di Bagi Menua Limbang enggau Orang Ulu di Bario.

“Di baruh program transformasyen menua pesisir Pemansang Wilayah Utara, tu sebagi ari batang tuju kami ngangkatka sektor kerebau nyadi pengawa ekonomi besai ditu,” ku iya.

Kelimpah ari nya, Uggah mega udah ngemendarka agih belanja tambah penyampau RM1 juta ungkup Pelilih Limbang enggau Lawas ari peminta Kaban Kunsil Nengeri (Adun) Batu Danau Paulus Gumbang