Sektor konteriktor digital ulih dikemujur nengah Bajet 2021

KUCHING: Pengawa bekenaka teknologi dalam sektor konteriktor digital ulih dikemujur nengah agih belanja ke udah diberi Perintah Besai ba Bajet 2021.

Menteri Kanan Kereja Raya, Datuk Seri Fadillah Yusof madahka tu seriris enggau polisi Opis Menteri Kereja Raya (KKR) nyingkang ngagai sektor konteriktor digital.

Ku iya, besai amat pengandal agih belanja nya setipak enggau pengawa nyendiaka teknologi lebuh menua benung betapi enggau pandemik Covid-19.

“Teknologi tu beguna amat diatu ngambi kitai enda kelalu bepanggai ba pengereja menua luar.

“Kelimpah ari nya, teknologi baru menua kitai ulih besemekih seikas Revolusyen Industri 4.0 (IR 4.0) baka diguna ba menua maju bukai diatu.

“Ambika chunto, kitai ulih ngena manah teknologi IR 4.0 baka robotik, automosyen, Big Data, kereban internet (IOT), realiti maya (VR) enggau pengelandik nengkebang (AI) endang beguna amat dikena nempa menua maju ke mua,” ku iya.

Fadillah mansutka penemu nya ba Program Gempuru Menteri Kanan Kereja Raya Begulai Enggau Editor Media Sarawak ba sebengkah hotel tebilang ditu, ngalihari tadi.