Sekula ba menua ulu patut dibuka – STU

KUCHING: Serakup Pengajar Sarawak (STU) minta Opis Menteri Pelajar Malaysia (KPM) ngemendarka sekula dibuka baka selama ba menua ulu.
Presiden iya, Adam Prakash Abdullah madahka pekara tu beduduk ari komuniti ba menua ulu nadai betemu enggau orang luar.
“kebuah pi laban nembiak enggau pengajar diau ba zon selamat lalu pejalai sida dipatau.
“Nya kebuah, bala nembiak ba zon selamat ulih nurun ke sekula baka selama laban sida endang nadai bepanggai ngagai arus penyambung ngelama tu,” ku Prakash, ditu tadi.
Taja pia, Prakash nyemetak madahka inisiatif nentuka semua sekula enggau nembiak nerima arus penyambung mesti ditampung ngambi nambahka kualiti belajar.
“Naka tu, bala nembiak ke diau jauh ba menua ulu patut diberi peluang belajar baka selama.
“Aku pechayaka bala pengajar ti gawa ba menua ulu mega deka nerima manah penemu tu.
“Kitai mesti beratika mayuh chara ngambi bala nembiak ulih belajar baka selama,” terang iya.
Berebak enggau nya, Prakash madahka bantu timpuh panjai mesti dilanggur perintah enggau KPM laban Pengawa Ngajar enggau Belajar ba Rumah (PdPR) nya inisiatif pemadu manah maya pandemik Covid-19 tu.
Terang iya, kebuah pia laban PdPR ti dipejalai diatu meri pemar ngagai bala nembiak sereta mayuh nembiak ba menua ulu enggau menua pesisir tu tinggal belajar ketegal nadai arus penyambung enggau kereban elektronik.