KUCHING: Ba jeman ti deka datai Sarawak begunaka sekula ti seikas enggau sekula entarabansa sebaka menua luar.
Kepala Menteri Datuk Patinggi Abang Johari Tun Openg madahka dalam nyapai pemujur tu, kitai patut ngembuan kualiti nembiak ti seikas baka nembiak entarabansa.
“Pekara pelajar kelia enggau diatu enda sebaka agi, laban bala nembiak kekadang ulih betanya ngagai bala pengajar lebuh malam hari.
“Enti Sarawak deka pintar, kitai patut bisi ngembuan pengajar enggau nembiak ti pintar,” ku iya.
Abang Johari bejaku munyi nya lebuh nyadi pengemata Nyain Sempekat Entara Saradise Sdn Bhd Enggau Sekula Entarabansa Borneo (BIS) numbuhka sekula BIS baru ditu, kemari.
Ku iya, kerejasama entara serikat peribit enggau sekula amat manah dalam nyeridi bala nembiak sekula seikas enggau entarabansa.
“Awakka serikat Saradise nyadi pengepun lalu ditangkan mayuh agi serikat besai ngatur kerejasama ti baka tu.
“Bisi dua pekara di Sarawak ti diperambu manah seikas entarabansa iya nya pemanah sekula enggau pemanah sepital,” ku iya.
Sekula BIS ti baru deka digaga enggau perengkaguna ti moden nyengkaum bilik belajar, makmal sains, studio seni enggau drama, palan nyemerai enggau padang main bol ti ulih nampung urung 1,200 iku nembiak diau dia.
