Sekula endang patut dibuka berenggat

KUCHING: Perintah Sarawak nengah Komiti Penyangga Penusah Nengeri (JPBN) Sarawak patut berundingka pengawa muka sekula berenggat.

Presiden Serakup Pengajar Sarawak (STU), Adam Parkash Abdullah madahka anang nganti nyentuk kes majak nambah baru deka muka sekula.

Ku Prakash, sida nerima manah pekara ti udah dibantaika Kordinator Komiti Penyangga Penusah Bagi Menua Sibu (JPBBS), Dr Annuar Rapaee pasal pengawa muka sekula primari enggau sekondari ba bagi menua nya chara begintir.

Prakash madahka sekula ba Sibu deka dibuka chara begintir pengelama empat minggu pengudah sekula berengkah dibuka Hari Satu tu tadi.

“Kes Covid-19 majak nambah ba pelilih enggau bagi menua tu lalu pemutus baka nya endang patut dikena nyeliahka igi penyakit nya ari terus ngerekai ngagai sekula.

“STU udah nerima mayuh sebana ari raban sekula enggau pengajar minta Perintah Sarawak enggau JPBN muka sekula berenggat.

“Pia mega, sida dekaka Pengawa Ngajar enggau Belajar Ari Rumah (PdPR) ditampung baka ti udah dipejalai sekumbang pandemik Covid-19 tu,” terang iya.

Suara Sarawak