Selampur Sarawak nerima perengkaguna pemun 2025

LIMBANG: Perintah Sarawak nagit semua sitak ba Sarawak serap nerima perengkaguna pemun manggai taun 2025.

Menteri Muda Betanam Betupi, Tanah Adat enggau Pemansang Kandang Menua Sarawak Datuk Dr Abdul Rahman Ismail madahka tagit nya dibantaika Kepala Menteri Sarawak Datuk Patinggi Abang Johari empu apin lama ke udah.

Ku iya, pemesai Sarawak nyauka sebaka enggau Semenanjung Malaysia ke alai lebih 6000 genturung pendiau ke bisi ba Sarawak tu.

“Genturung pendiau ke mayuh enggau enda sebaka ba semua endur seraya gaya rampa menua ke bebukit ngujungka kitai begunaka mayuh awak mai pemansang infrastruktur ngagai semua endur baka jalai alun, bekal ai beresi enggau bekal kuasa karan.

“Tang, Perintah Sarawak udah bisi pelin ke sistematik nentuka pemansang nya ulih dipejalai ungkup pengelantang rayat ditu.

Iya mansutka jaku nya ba Program Pejalai Nemuai seraya Gawa Menteri Muda Utiliti (Bekal Ai) enggau Meri Penyedar sereta Pelajar Sistem Bekal Ai Alternatif Sarawak (Sawas) di Kampung Belantak, ditu tadi.