Selangau patut digagaka sepital

SIBU: Pelilih Selangau begunaka sebuah sepital perintah ungkup pengelantang peranak ba pelilih nya.

Adun Tamin, Ir Christopher Gira Sambang lebuh dirandau madahka iya udah ngenataika peminta nya ngagai Sapit Menteri Pengerai II, Datuk Aaron Ago Dagang.

Gira ngenataika peminta nya rambau penatai Aaron lebuh ngulu Program Malaysia Prihatin ti udah diatur ba Balai Mayuh Guna Selangau kena Hari Empat tu tadi.

“Kitai deka nyendiaka servis pengerai ngagai lebih 30,000 iku peranak ba Pelilih Selangau lebuh sepital ditumbuh.

“Sepital patut ditumbuh nitihka penyampau peranak ti nguan pelilih tu ngambi nyaga pengelantang enggau pengerai sida,” ku Gira nerang.

Iya madahka komuniti ba pelilih nya nyau ngelawa Sepital Sibu, Miri tauka Mukah lebuh berubat laban pelilih Selangau nadai sepital.

Nya alai ku iya, bisi sekeda pesakit nyau berundang sereta bejalai jauh lebuh berubat ninting bulan.

“Kebuah pia laban klinik ke bisi ba Pelilih Selangau nadai fasiliti enggau servis penuh.

“Aku ngasaika pelilih Selangau patut bisi sepital bepelasarka penyampau tubuh peranak nguan pelilih tu,” terang iya.

Beduduk ari nya, Gira mega madahka perengkaguna ba klinik pengerai ba pelilih tu mesti dikemanah.

Terang iya, tu nyengkaum Klinik Sungai Arip, Klinik Tepus, Klinik Sekuau, Klinik Nanga Tamin enggau Klinik Pasai Siong Hilir.

Iya mega madahka sebuah Palan Betuchi Tungkul Sengayuh mega patut ditumbuh laban naka diatu, bisi 30 iku pesakit tungkul sengayuh nyau betuchi ba Sepital Sibu tauka Sepital Mukah.

“Nitihka penerang, projek nirika palan betuchi nya diatu udah ba renggat ditinda.

“Pia mega, sebuah mesin X-ray mega beguna amat ba Klinik Pengerai Selangau ditu,” ku iya mantaika peminta diguna.

Rambau penemuai Aaron ngagai Selangau, Gira mega udah minta numbuhka siti blok kuarters enggau 31 rumah ungkup staf ba Klinik Pengerai Selangau.

“Naka diatu, bisi sekeda staf ba klinik tu nyau berundang ari Sibu ngagai Selangau maya gawa,” terang Gira.

Suara Sarawak