ARTIKEL

Selangor mungkal program baru Program Setaun Begulai Enggau Perintah MADANI Renggat Nengeri

Facebook
Twitter
LinkedIn
WhatsApp
Telegram

KUALA LUMPUR: Program Setaun Begulai Enggau Perintah MADANI Renggat Nengeri deka belabuh di Selangor ba bulan Januari taun baru, ku Menteri Besai, Datuk Seri Anwar Ibrahim.

Anwar madah, pengudah meda pemujur program nya pengelama tiga hari belabuh ari Hari Lima ti udah ba tengah laman Stadium Nasional Bukit Jalil ditu, endang patut program nya diatur ba renggat nengeri ngambi meri peluang ngagai rayat ngaga pemutus kediri empu pasal Perintah Penyerakup.

“Setahun kitai merintah, ripot meh pekara ti udah digaga ungkup rayat lalu rayat datai ngaga pemutus kediri empu, beri awak ngagai sida meri perambu enggau buah penemu.

“Berindik ari pemujur tu (ba Bukit Jalil), kitai deka nurun tauka mindah fasiliti (program) tu ngagai renggat nengeri lalu Menteri Besai Selangor, Datuk Seri Amirudin Shari setuju ngepunka program nya di Selangor,” ku iya.

Anwar mansutka jaku nya lebuh bejadi pengawa nutup Program Setaun Begulai Enggau Perintah MADANI ba tengah laman Stadium Nasional Bukit Jalil, kemari.

Ku Anwar ke mega Menteri Pekara Wang, pengudah Selangor, program nya deka diatur ba nengeri bukai enggau kos baruh agi kelimpah bulih bantu ari perintah nengeri.

Anwar mega meri terima kasih ngagai semua raban bekaul ti ngemujur Program Setaun Begulai Enggau Perintah MADANI.

“Pengawa ngatur program tu ngaul semua opis perintah, opis menteri ejensi, GLC (serikat bekaul perintah) lalu tu chukup ngemegah ati laban ba eksibisyen tu, program tu enda ngarika sesebuah opis perintah, opis menteri, siku-siku menteri tang ngarika semua tuai komuniti MADANI,” ku iya.

Ngelansa Perintah Penyerakup ti udah setaun merintah, Anwar madah, rayat ulih meda kediri empu genap polisi tauka pelin ti udah dipejalai semua opis menteri nengah program nya.

“Polisi perintah sekali ke Ekonomi MADANI, pengalih kuasa, transformasyen digital tauka tungkap baru Langgur Pemansang Malaysia Lumpar Ke-12 (RMK-12) enggau pelin besai pengawa industri dibantai, nya ukai semina dibantai atas keretas aja.

“Aku nyebut enda semua (pengawa bejalaika polisi perintah) ba tikas pemadu manah sereta ngemantupka ati tang agi bisi awak endur dikemanah agi lalu kitai belabuh enggau siti ubah besai, reti nya pemerani, pengeransing ngaga ubah lalu berubah ari chara lama ngambi menua enggau rayat bulih penguntung,” ku iya.

Anwar madah, konsep demokrasi penyereta enggau demokrasi ti bisi tanggungpengawa ngaul kerejasama entara raban kabinet, bala pengatur pemadu tinggi ba perintah, pengereja pengawa perintah, raban peribit sereta mensia mayuh meseti dikereja dalam Perintah Penyerakup ngambi semampai nyungkak pemansang menua.

“Aku minta reti demokrasi penyereta nya bisi reti agi dalam Perintah MADANI laban udah datai maya endur penuai politik enda dilempai enggau dipanggai ngagai pemesai politik aja tang nyerahka nya ngagai rayat enggau meruan ngambi ngaga pemutus kediri empu bepelasar ke fakta, ukai pemula.

“Aku pechaya tu pekara ti manah, reti nya demokrasi penyereta ari rayat, ari renggat baruh, gerempung pengereja pengawa, raban pengereja, pekebun enggau orang berikan laban pengawa kitai tu nadai reti enti enda meri penguntung terus ngagai sida,” ku iya.

Bejaku pasal demokrasi ti bisi tanggungpengawa, Anwar nyemetak madah, semua tuai enggau pengatur pengawa perintah pemadu tinggi patut bisi tanggungpengawa ba pengawa sida kelebih agi dikena nentu genap projek dipejalai manah.

Iya madah, taja pen mayuh pengawa, iya tetap nanggung pengawa enggau ngenataika diri ngagai aum Parlimen lebuh sesyen Maya Nanya Menteri ngambi meri penerang pasal isu kemaya hari.

“Taja pen bisi tusah lalu kadang nating aku (meri penerang ba sesyen) Maya Nanya Menteri (di Parlimen) tang nya nyadi siti chunto baka ni tanggungpengawa patut dipejalai.

“Ukai semina lebuh pengawa bepilih tauka pengawa Parlimen aja,” ku iya.

Atas tanggungpengawa iya ke nyadi Menteri Besai, Anwar meri chunto, perintah deka nyendia agih belanja ekonomi maksimum RM100,000 ba genap genturung pendiau dikena bejalaika program tauka projek pemansang ti seraris nitih ke guna pemadu besai sida, belabuh ari taun baru.

Ngelansa pekara bukai, iya mega madah, pengawa penyakal ti nguji “nebuk atap” enda ulih mujur laban Perintah Penyerakup ti disereta 18 parti komponen bisi “perabung konkrit”.

Pengelama setahun nyadi tuai perintah, Anwar ngaku enda kala sekali pen nyadi laya ketegal bida polisi parti siku-siku.

“Perambung kitai perambung teguh. Diatu di Putrajaya nadai atap ditebuk.

“Pengawa nguji nebuk atap tu, bisi madah ba bulan Ogos tang ba runding aku, kitai bisi pengering.

“Aku dalam Kabinet Menteri bedau sekali pen bisi laya ketegal bida parti, bida penemu siku-siku,” ku iya ba sesyen dialog Pengawa Nutup Program Setaun Begulai Enggau Perintah MADANI ti diseretai kededua Sapit Menteri Besai, Datuk Seri Dr Ahmad Zahid Hamidi enggau Datuk Seri Fadillah Yusof.

LAIN-LAIN BERITA

Bakih strategik KGC deka ditambah

SARIKEI: Opis Menteri Pemansang Indu, Nembiak Mit enggau Pengelantang Komuniti Sarawak (KPWK) benung chakah ngatur pengawa sida ngambi mayuh agi premis nerima Kenyalang Gold Card

TYT Sarawak bulih gelar Pehin Sri

KUCHING: Tuai Pemegai Menua (TYT) Nengeri Sarawak, Tun Dr. Wan Junaidi Tuanku Jaafar udah nerima Darjah Utama Yang Amat Mulia Satria Bintang Sarawak (S.B.S) ke

KDJA ngerami 200 pengemeran media malam tadi

KUCHING: Lebih 200 iku pengemeran media dirami nyerumba Pengerami Makai Lemai Taun Baru China Gerempung Pemberita Bagi Menua Kuching (KDJA) malam tadi. Sekeda program bisi

Sistem belanja seikas menua maju

MIRI: Perintah Sarawak benung nungkap pengawa numbuhka sistem belanja ti seikas enggau menua ti udah maju ba rantau tu. Premier Sarawak Datuk Patinggi Tan Sri

BERITA TERBARU

Puasa pupuk kesabaran

KETIKA matahari terik di atas kepala sambil memancarkan sinarnya, ia membuatkan kita rasa tidak selesa dan letih akibat panas yang tidak terhingga.  Apatah lagi menjelang

Puteri Balqis sekat pengikut toksik

PELAKON, Puteri Balqis bertindak menyekat mana-mana individu toksik yang sering menghina, mengejek serta memperlekeh wajahnya.  “Apabila saya bertutur dalam bahasa Inggeris kerana sudah terbiasa dan

Komuniti desa berpendapatan tinggi

Ketika berucap pada majlis yang sama,Timbalan Ketua Pengarah (Keusahawanan) MARA, Datuk Zulfi kri Osman turut mengucapkan syabas dan tahniah atas kemenangan yang diperoleh dalam pertandingan