LUBOK ANTU: Bisi semilan genturung pendiau di Ulu Lemanak sebana nengah Jalai Batang Sebeliau – Ulu Lemanak pengudah jalai nya putus, tekerap enggau rusak ketegal tanah runtuh.
Tuai Rumah Nanga Bangai, Thomas Ringkai madah, penusah tanah runtuh ti nyadi ba sekeda endur ba jalai nya meri penanggul ngagai perayat dia nengah jalai nya.
Ku iya, penusah nya nyadi ba sitak Mato ngagai sitak Uyau berebak ari musin landas ti nyadi berapa minggu ke udah.
“Tanah tusur ti ngempang jalai ngujung jalai batang tu putus lalu enda ulih ditengah entukar enggau motosikal.
“Musin landas tu mega ngujung sekeda endur ba jalai batang ditu rusak enggau tekerap.
“Pekara tu meri penanggul ngagai perayat ba semilan genturung pendiau ditu nengah jalai tu,” ku iya.
Semilan genturung pendiau nya nyengkaum Patuh, Payan, Uyau, Kekan, Tinting Brunai, Munggu Sangkis, Bilararap, Bangai enggau Entalau.
Thomas madah, perayat dia beripai ngaga jalai puntang ngambi ulih ditengah motosikal tang nya enda ulih ditengah entukar.
Nya alai, iya ngarap raban bekaul kelebih agi pengari rayat di sitak nya beratika penusah nya lalu ngiga jalai dikena mutar penusah nya lengkas.
Kaban Parlimen Lubok Antu, Roy Angau Gingkoi madah, iya udah nerima ripot bekaul penusah nya.
“Aku bisi nerima ripot bekaul penusah tu lalu udah ngenataika pekara tu ngagai Komiti Penyangga Penusah Nengeri (JPBN) Sarawak ngambi mutar penusah tu,” ku iya.
Roy mansutka jaku nya lebuh dirandau pemberita Ruai Suara Sarawak bekaul sebana perayat Ulu Lemanak nya.
