Selingkut jalai ditanam orkid agi diperunding

KUCHING: Perambu nanam orkid ba selingkut jalai selampur Kuching apin ulih dipejalai laban tikas mensia mayuh sedarka pemesai guna bungai tu apin bisi.

Datuk Bandar Dewan Bandaraya Kuching Utara (DBKU) Datuk Abang Abdul Wahap Abang Julai madahka sebagi ari tuju Aum Besai Orkid Asia Pasifik Ke-13 2019 (Apoc13) iya nya ngemai mensia mayuh sedarka pemesai guna bungai tu ditanam.

“Nengah aum besai tu kitai ngarapka sida sedarka pemanah gamal sereta nerenak ulah puh nyaga bungai.

“DBKU udah nyain sempekat pemerti ati (MoU) enggau Gerempung Orkid Sarawak ba pengawa ngelagu selingkut jalai ditu tang komuniti patut sedarka tuju enggau guna iya.

“Kitai mega patut bejalaika pengawa meri penyedar ari renggat tumu baka ba sekula,” ku iya.

Abang Abdul Wahap mansutka jaku nya ba Pengerami Nutup Program Licha Apoc13 ba Palan Aum Borneo Kuching (BCCK) ditu, ensanus.

Ku iya, tu beguna amat dikena nyeliahka penanggul rama baka enchuri orkid ti ditanam laban pekara tu kala sereta suah amat udah nyadi.

“Kami kala nanam pun bungai ti manah, enda datai dua hari endur bungai nya lenyau.

“Nya kebuah kitai patut ngemai mensia mayuh sedarka pekara tu nentuka sida bisi tanggungpengawa besaup nyaga orkid tauka bansa bungai bukai ditanam dia.

“Naka diatu, kitai nguji nanam orkid ba tiga selingkut jalai nyengkaum di BCCK, endur kitai beratika gaya pemujur tuju pengawa tu,” ku iya.

Enti sema pengawa ba tiga selingkut jalai tu mujur, baru kitai deka nampung pengawa ba selingku jalai DBKU dulu sebedau ditampung endur bukai.

“Aku ngarapka mayuh sama nemu sereta meretika tuju enggau guna pengawa ngemanahka rampa menua kitai,” ku iya nandu.

Datuk Abang Abdul Wahap Abang Jula