KUCHING: Naka 2 Julai tu tadi, urung 261,280 iku rayat Sarawak udah nerima dua dos vaksin Covid-19 tauka udah nerima vaksin penuh.

Kepala Menteri Datuk Patinggi Abang Johari Tun Openg madahka penyampau dos keterubah udah diberi ngagai rayat bisi 1,227,579 iku iya nya urung 42 peratus.

“Dos kedua tauka sida ti udah nerima dos penuh urung 10 peratus.

“Ba Bagi Menua Kuching nyengkaum Bau enggau Lundu, kitai udah meri vaksin ngagai 304,570 iku dos keterubah ke alai 62,367 iku udah nerima dos kedua,” ku iya.

Abang Johari bejaku munyi nya pengudah ngelawa Vaksin Mindah Kin Kitu di Palan Meri Vaksin (PPV) Balai Mensia Mayuh Matang ditu, kemari.

Iya nandu, juluk nyapai 60 peratus rayat menua tu nerima vaksin Covid-19 nyau deka nyadi nyata.

“Nitihka tagit Uggah (Sapit Kepala Menteri Datuk Amar Douglas Uggah Embas) diatu kitai nagit 60 ribu kapasiti sehari enti dibanding enggau sebedau tu 50 ribu kapasiti sehari.

“Aku meri terima kasih ngagai rayat laban udah meri kerejasama ngelaban pengerekai penyakit Covid-19 nengah chara nerima vaksin.

“Kitai ngarapka ulih mulaika pengidup baka suba taja dalam chara baru, tang pemadu beguna rayat Sarawak mesti dilindung pengabis nadai 80 peratus sebedau ujung bulan Ogos tu ila,” ku iya.

Ngelansa pengawa ngelawa Mobil Vaksin Mindah kemari, Abang Johari madahka program nya diatur raban Adun Tupong Fazzrudin Abdul Rahman begulai enggau Kaban Parlimen Petra Jaya Datuk Seri Fadillah Yusof nengah kerejasama raban peribit baka klinik enggau serikat peribit.

“Sida bekerejasama meri vaksin ngagai raban diselinting, ditu laban palan tu dikumbai puting mengeri. bandar’.

“Kami udah ngelawa menua pesisir nyengkaum ke Kapit enggau menua pesisir ke bukai, atur program iya sebaka.

“Semina ditu kitai ulih mai bas meri vaksin ngagai rayat,” ku iya.

Ku iya, kemari raban pengatur program meri vaksin nagit deka nuchuk 1,000 dos sehari.

“Pengawa tu deka ngemuntangka rayat nerima vaksin laban sida enda ibuh nuju palan ti jauh.

“Kedua, sida ti udah tuai tauka sakit enda ulih angkat mega ulih nerima vaksin laban pengatur program bisi nyendiaka pengawa meri vaksin ngagai rumah.

“Tu siti pengawa tu pemadu manah dalam nentuka rayat Sarawak ampit nerima vaksin magang, lalu kami meda program tu diatur mujur,” ku iya.