Semampai kena sengkabung mua, enti sektor ekonomi udah dibuka

SIBU: Menteri Muda Pekara Pelajar, Sains enggau Pansik Teknologi, Dr Annuar Rapaee nangkan mensia mayuh semampai ngena sengkabung mua enti sektor ekonomi ba menua tu udah beoperasyen baru kena Hari Dua tu kelebih agi lebuh bejalai ba palan mensia mayuh.

Ku iya, pengawa ngena sengkabung mua tu beguna amat enggau ukai semina sida ti bisi kelai tauka sakit aja ke diasuh ngena iya.

“Bisi data madahka menua ti mujur ngelandaika graf kena rampit enggau jampat laban rayat iya semampai ngena sengkabung mua.

“Tang, bisi orang ngasaika sengkabung mua nibuh dikena ba palan mensia mayuh kelebih agi sida ti ukai pesakit tauka nadai kelai,” ku iya nerang, ditu kemari.

Taja pia, Dr Annuar madahka sengkabung mua nya meseti dikena semua orang ba palan mensia mayuh nyentuk vaksin Covid-19 ditemu.

“Kebuah pia laban sida ti ditepan virus tu tang nadai kelai nya ngerikod peratus tinggi ngerekai virus iya nya 6 ngagai 18 peratus.

“Sekali batuk, kita ulih ngerekaika 3,000 droplets ti ngundan Corona Virus,” ku iya.

Suara Sarawak