Semaya royalti meseti dikeamat

KUCHING: Menteri Dagang Temuai, Seni Enggau Main Asal Datuk Abdul Karim Rahman Hamzah minta perintah Pakatan Harapan (PH) ngamatka semaya meri 20 royalti minyak ngagai Sarawak.

Ku iya, semaya nya siti ari manifesto PH ba pengawa bepilih ke udah lalu meseti dikemujur.

Karim nimbal jaku Menteri Besai Tun Dr Mahathir Mohamad kena Hari Empat tu tadi ba siti aum di New York alai iya madah bayar nya enda ulih dikemujur.

Dr Mahathir ba New York ketegal ti ngulu Gempuru Besai ke-74 Pertubuhan Bangsa-Bangsa Bersatu (PBB).

“Rayat semua nemu dia semaya nya siti ari manifesto pengawa bepilih Pakatan Harapan.

AUM PEMBERITA…Karim (duduk dua ari kanan) pada aum pengarang berita di Kuching kemari.

“Kitai semina minta sida ngamatka semaya ngagai rayat. PH besemaya meri 20 peratus royalti minyak, tang pengudah menang ba pengawa bepilih sida nadai pengeran deka ngamatka semaya nya.

“Pekara tu mandangka sida udah bebula,”ku Karim ba aum pengarang berita pengudah bejadi Pesta Burung Asia Ke-10 2019 di Waterfront Kuching kemari.

Ngenang isu ke sama, Karim madah menua enda deka bankrap tajapan Perintah Besai mayar 20 peratus royalti nya ngagai Sarawak enggau Sabah.

Iya pechaya pekara nya semina diangkat nyadika dalih PH aja.

“Ngelamatu Sarawak semina nerima 5 peratus aja alai laluh 95 peratus diempu Petronas.

“Kitai mega nemu dia Perintah Besai nerim bayar royalti ari Chukai Petroleum (PITA) ba penyampau 38 peratus.

“Nengah bayar nya, Perintah Besai ulih ngagihka setengah ngagai Sarawak enggau Sabah,”ku iya.

Karim ke mega Menteri Nembiak enggau Lumba bela enda setuju enggau penemu Dr Mahathir ti madah Petronas ukai agi kompeni antarabansa enti ngagihka Sarawak enggau Sabah bayar royalti 20 peratus.

Saut Karim enggau engkeman, bayar royalti nya semaya alai PH meseti ngemujur semaya nya.

Suara Sarawak