Semilan pintu peranak Rh Sating kena tanah tusur

BINTULU: Semilan pintu peranak Rumah Sating Anak Bundan ba KM67 Jalai Bintulu-Miri begau laban tanah tusur lalu ngerusak dapur rumah sida.

Ku Tuai Rumah Sating, 50, penusah nya nyadi maya sida ke indu angkat nyumai urung pukul 5.00 pagi kemari.

“Sida ke indu tekenyit lebuh maya deka berapi sereta nyauk ai meda paip nadai pansut ai sekali dijenguk ke ujung bilik meda tanah udah tusur,” ku iya.

Sating mansut ke jaku nya lebuh ke dirandau pengarang berita, lemai kemari.

Ku iya, sida semilan pintu ke kena penusah tu iya nya sida ke baru nampil rumah panjai sida.

“Dijangka ke tanah tusur tu nyadi urung dini hari, tang taja piak peranak rumah panjai kami nadai ninga ketegal ke jenak tinduk,” ku iya.

Nambah ke nya, Tuai Rumah nya madah, penusah tu nyadi berindik ari ujan bangat kira dua hari ke udah.

Ba penusah nya, nadai penusah bakal tauka bebadi nyawa diripot nyadi. Pemanjai Rh Sating bisi 67 pintu lalu semina semilan pintu sida ti kena pangka penusah tu.

Sama bela bisi datai ngesah penusah nya iya nya Kaban Kunsil Negeri (ADUN) Samalaju begulai enggau sida JKR Bintulu.

TUSUR… Tanah tusur ke nyadi ba Rh Sating.

 

ENDA LIKUN… Gaya tanah tusur ti ngerusak langkau dapur peranak Rumah Sating.