Semilan sekula repuk di Betong diseleti

KUCHING: Semilan buah sekula repuk ba sitak Parlimen Betong udah dikemendar diseleti di baruh pinjau kontra RM1 bilion Perintah Sarawak.

Menteri Pelajar II, Datuk Mah Hang Soon madah, entara sekula ti deka diseleti tu iya nya Sekula Primari (SK) Mangut, SK Spaoh, SK Bungin, SMK Spaoh, SK Medang, SK Tui, SK Suri, SK Nanga Gayau di baruh renggat keterubah seraya SK Paku Central diseleti ba renggat kedua.

“Pejalai projek nyeleti begunan repuk ba sekula Sarawak ti dipelaba ngena agih belanja RM1 bilion iya nya bayar kontra nitihka chara khas.

“Chara nya bela dipesetuju entara Opis Menteri Pelajar Malaysia (KPM) enggau Perintah Sarawak nyentuk bulan Julai tu tadi ke alai RM700 juta pinjau nya udah dibayar.

“Projek nyeleti begunan repuk tu nyengkaum ngaga bilik kelas, blok pengatur pentadbiran, buding, rumah pengajar, dewan makai, palan komputer, bilik sains, agu enggau perengkaguna bukai,” terang iya.

Hang Soon mansutka jaku lebuh nyaut tanya Kaban Parlimen Betong Datuk Robert Lawson Chuat ti ngasuh Menteri Pelajar ba Aum Parlimen nya madahka status projek nyeleti tauka ngaga baru sekula repuk ba Sarawak baka disemaya Perintah Besai sebedau tu pengudah Perintah Sarawak mayar RM700 juta nyadi bayar pinjau kontra RM1 bilion.

Terang Hang Soon, projek nyeleti begunan repuk ba sekula nya ti ngena agih belanja RM1 bilion dipejalai ba tiga renggat.

“Ba renggat keterubah, bisi 41 buah sekula repuk deka diseleti ngaul belanja penyampau RM350 juta.

“Ba renggat kedua, 52 buah sekula deka diseleti beungkus RM350 juta lalu rintai nama sekula enggau skop projek ba renggat ketiga benung dikerandau KPM begulai enggau Perintah Sarawak beungkus RM300 juta.

“Naka 17 Ogos tu tadi, Perintah Besai udah ngemendar 93 projek ba renggat keterubah enggau kedua ti beungkus RM700 juta. Bisi 21 projek benung digaga enggau 20 projek agi deka digaga ba renggat keterubah,” terang iya.

Nambahka nya ku iya, status projek ba renggat deka digaga tu mungkur empat projek deka ditinda, lima projek agi ngeluarka surat setuju terima, lima projek ba pengawa nyiri kunteriktor enggau enam projek disadang deka ditinda ujung bulan September tu.

“Ba renggat kedua, semua projek nya deka digaga lalu piak Opis Kereja Raya (JKR) Sarawak benung nyukat enggau nyendiaka dokumen tinda sereta projek disadang deka ditinda chara berengat bepun 22 Ogos tu,” terang Hang Soon silik agi.

Suara Sarawak