Semilan strategi nyungkak ekonomi pengudah Covid-19

KUCHING: Perintah Sarawak numbuhka Kaunsil Pengatur Ekonomi Sarawak dikena ngatur Strategi Mulaika Pemanah Ekonomi Pengudah Covid-19 nyentuk 2030.

Kepala Menteri Datuk Patinggi Abang Johari Tun Openg madah, kaunsil tu deka beratika semua pekara ti mungkur semilan perambu dikena ngemansangka ekonomi, pekara rama enggau sektor perintah lalu nerima timbal ari pemegai puku nyengkaum balai orang dagang, profesional enggau akademik.

Ku iya, sida tu deka bejuraika pekara ari mayuh sektor lalu ulih merambu pelin pengatur agenda ekonomi Sarawak ke alai pemutus deka dianjung ngagai perintah dalam bulan September 2020.

“Pangka pengerekai igi penyakit covid-19 tu udah meri mayuh penemu baru lalu kitai enda ulih bejalaika pengawa dagang baka selama.

“Tu siti pekara enda kala diasai ngelamatu lalu diatu kitai patut napi ngena chara baru nyengkaum ke deka datai.

“Nya kebuah kami beratika pemansang strategi nengah Langgur Pemansang Malaysia Lumpar ke-12 dikena mulaika baru ekonomi, ngena chara baru sereta nyungkak pemansang ekonomi,” ku iya madah ba aum pemberita di Wisma Bapa Malaysia ditu, tadi.

Suara Sarawak