GEDONG: Opis Menteri Nembiak, Lumba enggau Pemansang Dagang naka ulih meransang raban nembiak Sarawak awakka lebih rindu ngemeranka aktiviti lumba.

Menteri iya, Datuk Seri Abdul Karim Rahman Hamzah madahka, pansik indeks ti dipejalaika opis menteri iya di semua pelilih menua Sarawak nemu kaul nembiak dalam sukut lumba semina 44.9 peratus aja.

“Angka tu nadai nyapai setengah peratus patut diperati. Nya alai opis menteri emggau perintah Sarawak bebendar ngatur mayuh program enggau bebendar ngatur pengawa nya.

“Entara nya Premier Sarawak Datuk Patinggi Tan Sri Abang Johari Tun Openg udah ngemendarka tambah ngagai 17 buah kompleks lumba mit di serata nengeri.

“Kitai pechaya udah perengka guna lumba enggau bemain tu disediaka, daka bisi ayan minat mensia mayuh deka ngaul diri dalam aktiviti lumba ngujungka kitai ulih meda nembiak ti bepenau ti ulih ngarika nengeri tauka menua ngagai renggat ti lebih tinggi,” ku iya.

Iya bejaku munyi nya rambau Program Sarawak X-Tive Renggat Nengeri 2022 ti dipenyadika Abang Johari yang juga Adun Gedong di Gedong, ditu kemari.

Tandu iya, opis menteri ita mega udah besedia deka bejadika program enggau aktiviti sepemanjai taun tu ba serata menua enggau rambai jaku ‘nadai minggu nadai program’.

“Nya nyengkaum program e-lumba, lumba ekstrim, fun ride, mai basikal, lumba rayat bagi nyapai minat mesia mayuh ngagai lumba,” ku iya.

Ngelansa program nya, Abdul Karim madahka program keterubah tu diatur enggau dipejalaika ba semua 12 bagi menua Sarawak seretau ke alai sida nyelinting 12,000 iku mensia disadang ngambi bagi ba program tu.

“Entara komponen lumba ti ditemu ungkup dikemanahka iya nya lumba ekstrem, lumba rayat, lumba ti dikerindu enggau ke bukai nyengkaum lumba ti sudah diatur rayat menua baka di Gedong ti ngatur lumba perau.

“Aku mega ngarapka program tu ulih ditanka ninting taun awakka mai asil positif endur ngemansutka nembiak enggau komuniti ti gerai nyengakum ngerapitka kaul raban tuai enggau rayat,” ku iya.