SERIAN: Ulah Presiden Parti Keadilan Rakyat (PKR) Datuk Seri Anwar Ibrahim ti ngumbai diri bulih sukung penuh ari kaban parlimen semina ngasuh rayat saru penemu.
Presiden Parti Rakyat Sarawak (PRS) Tan Sri James Jemut Masing nyemetak madah, Anwar ti madahka diri ulih numbuhka Perintah besai Baru nya semina jaku tempa aja.
Ku Masing, ulah baka nya enda patut dikembuan siku ketuai enti iya amat lurus ati negika pengelantang rayat.
“Iya semina deka ngasuh pengundi Sabah saru penemu ti madahka rayat Sabah enggau Sarawak enda nyukung Tan Sri Muhyiddin Yassin.
“Ba aku empu, ulah iya tu enda patut dikereja siku orang ti bepenau enggau kala mangku pengawa Sapit Menteri Besai sebedau tu,” terang iya.
Mansing mansutka jaku nya lebuh dirandau pemberi pengudah Program Pemesai Begulai Enggau Rayat ba Balai Mayuhguna SJK Chung Hua Serian, ditu tadi.
