Semina mandangka adat nyabung manuk, nadai betuie – Johnny Chuat

BINTULU: Ketuai Publisiti pengerami Gawai Dayak Renggat Nasional 2019, Johnny Chuat nyemetak madah nadai pengawa nyabung manuk betuie sebedau enggau maya program ke diatur kena 17 nyentuk 19 Mei tu ila.

“Bisi sekeda piak bisi nyebut deka diatur aktiviti nyabung manuk ba sebengkah palan sebedau enggau lebuh pengerami Gawai Dayak renggat nasional diatur tu ila”.

Taja pia, iya madah pengawa ‘nyabung manuk’ tu semina deka diatur kena pagi 19 Mei ba rumah panjai, Henri Nuni Anak Plen di Sungai Gelam, Ulu Sebauh ungkup demonstrasyen ngagai orang ke datai senentang adat main asal bansa Dayak kelebih agi Iban ngambika dipandangka ba televisyen lalu ukai pengawa bejudi tauka betuie nyabung manuk.

Demonstrasyen ‘nyabung manuk’ tu dikena nunjukka sebengkah main asal enggau adat peturun bansa Iban menya lalu ukai aktiviti bejudi baka ke dikerembai ba media rama, ku iya.

“Lebuh demonstrasyen nyabung manuk tu dipejalaika, bala penyereta deka ngena ngepan bansa iban.

NADAI BETUIE…Semina demonstrayen adat lama nyabung manuk.

Kelimpah ari nya, temuai diberi lalau ngena ngepan ngambika aktiviti nya sebaka lebuh maya aktiviti nyabung manuk diatur dulu menya, ku iya.

Pengerami Gawai Dayak Renggat Nasional 2019 di Bintulu tu diatur Opis Menteri Komunikasyen enggau Multimedia Malaysia nengah kerejasama sebengkah Gerempung Pengintu Pengelantang Pendiau Dayak (Civil Dayak Societies) di nengeri tu.

Aktiviti pengerami tu bepun ari aktiviti Pasar Gawai Dayak di Sungai Plan, Bintulu kena ka 13 nyentuk 17 Mei, dibuka ngagai mensia mayuh ari pukul 10 pagi nyentuk 11 malam.

Program nyambut temuai tauka ‘Malam Mantar Gawai’ deka diatur ba sebuah restoran kena ka malam 17 Mei ngelaluka penatai Menteri Komunikasyen enggau Multimedia, Gobind Singh Deo.

“Aktiviti kepenudi Pengerami Gawai Dayak Renggat Nasional iya nya ‘Ngerandang Jalai Gawai’ deka diatur ba Padang Bilun Lama Bintulu tumu pagi 18 Mei.

“Kami merambu lebih ari 2000 orang penyereta ari mayuh serak komuniti Dayak di Sarawak enggau pupu raban bansa Dayak ari Kalimantan Barat, Indonesia,”

“Aku ngelalau ngambika mayuh agi gerempung tauka orang mayuh datai ngerijista nyereta ngerandang jalai ngambi sama ngerami pengawa keterubah iya diatur Gawai Dayak Renggat Nasional ,”

Sepengudah tembu pengawa ‘Ngerandang Jalai Gawai’ ngalih lemai 18 Mei, bala temuai diasuh ‘ngabang’ tauka ngusung nitihka pengawa rumah panjai ba Rumah Henri Nuni Anak Plen di Sungai Gelam, Ulu Sebauh.

Nambahka nya, ngalih ke pagi 19 Mei deka diatur pengawa ‘Sandau Hari’ udahnya meda aktiviti demonstrasyen nyabung manuk.

Pengawa nutup mega deka diatur ngalih lemai, 19 Mei lalu temuai ti dipebasa diperambu datai iya nya Menteri Besai, Tun Dr Mahathir Mohammad.

Bala temuai deka diperindang enggau mayuh bengkah aktiviti enggau pemerindang main asal ari bemacham pupu raban bansa Dayak nyengkaum pemerindang ari pupu raban bansa Dayak Kalimantan Barat, Indonesia.

Suara Sarawak