KUCHING: Taja pen Sarawak enggau Sabah nagih sekeda pekara kelebih agi di baruh Sempekat Malaysia 1963 (MA63), nya ukai niat Sarawak deka ngerampas hak orang.
Premier Sarawak, Datuk Patinggi Tan Sri Abang Johari Tun Openg nyemetak madah, kededua wilayah tu agi ulih bekerejasama enggau negapka kaul ungkup penyerakup menua ti meruan laban pengawa numbuhka Perintah Penyerakup nyadi kelai kaul nya ulih ditanggam manah.
“Perintah Gempung Parti Sarawak (GPS) beterima kasih ngagai Perintah Besai laban udah sedia mulaika hak Sarawak enggau Sabah, baka ti dirintai dalam Konstitusyen Perintah Besai enggau MA63 ti udah lenyau.
“Nya endang peminta semua rayat kitai awak hak enggau pengelebih dalam Konstitusyen enggau MA63 terus dibasa enggau dipejalai baka ti udah disetuju raban tuai ba taun 1963.
“Sarawak engka dituduh ngembuan ulah deka ngempu semua nengah peminta nya tang Sarawak semina deka hak dipulaika baru lalu nadai niat deka ngerampas hak orang bukai,” ku iya.
Abang Johari bejaku munyi nya rambau Pengerami Ngintu Hari Malaysia 2023 Renggat Nasional di Stadium Perpaduan Kuching, malam tadi.
Ku iya, Perintah GPS deka meri sukung ngagai Perintah Penyerakup terus tegap sereta meruan ngambi Perintah Penyerakup ulih meri fokus ngatur menua Malaysia nyadi menua ti teguh, pintar enggau MADANI.
