Sempekat disetuju Perintah Sarawak enggau Petronas meri pemaik ngagai rayat

KUCHING: Sempekat ke udah disetuju entara Perintah Sarawak enggau Petronas nempa sejarah ti ngemegahka kitai pengudah pekara nya diputar nengah undang-undang.

Luyar Shankar Ram Asnani madah, Petronas ti narit pulai apil ba pemutus Kort Tinggi nunjukka Ordinan Perlombongan Minyak Sarawak 1958 enggau Sarawak nya bakih kunsi ti diaku numbuhka Malaysia
“Pia mega, pengawa ngasuh mayar chukai jual nengeri (SST) nya bepelasarka Ordinan dan Peraturan Cukai Jualan Sarawak 1998 ti dikemendar Kunsil Nengeri (Dun), apin lama ke udah.

“Tu meri peluang ngagai Perintah Sarawak ngulihka penatai pemisi ninting taun ti berega bebilion ringgit, ukai semina ari Petronas tang mega serikat bukai ti beoperasyen ba Sarawak,” ku iya madah ngagai Suara Sarawak seharitu.

Terang iya, udah tentu pekara tu meri pemaik ngagai semua rayat Sarawak enggau pemansang meruan enti diadu enggau manah.

“Saman Perintah Sarawak ngagai Petronas nya nitihka bayar SST ba taun 2019 manggai RM2 bilion nyengkaum ukum iya.

“Nya kebuah, Perintah Sarawak ulih ngasuh mayar SST suku keterubah taun tu ditambah penyampau urung RM2 bilion agi,” terang Shankar.

Berebak enggau nya, iya bisi amat pengandal, Sarawak deka terus maju negika autonomi bidang pelajar enggau pengerai.

“Kepala Menteri Datuk Patinggi Abang Johari Tun Openg naka ulih ngemansang pelajar pelajar ngambi nempa modal mensia ti bisi kualiti tinggi.

“Kepala Menteri mega udah bejalaika inisiatif baru lebuh numbuhka opis menteri baru matau pekara pelajar ba menua tu,” ku iya.

Shankar mega madah, Perintah sarawak seruran ngemerat pekara bekaul nyaga pengerai.

“Nya alai, aku andalka Abang Johari ulih ngiring Sarawak ba pelasar ti betul,” ku iya nyemetak.

Suara Sarawak