Sempekat komersial Petronas – Sarawak enda ibuh dipetalat

KUCHING: Sempekat Komersial entara Petronas enggau Perintah Sarawak enda ibuh dipetalat, pia ku Kepala Menteri Datuk Patinggi Abang Johari Tun Openg.

Ku iya, pekara nya enda ibuh dipetalat laban Sarawak udah bisi hak pasal minyak enggau gis ba menua tu.

“Awakka pekara ke nyadi nentuka sekalika jaku dibantai sida ti ningkah pekara tu betul tauka enda,” ku iya nerang.

Abang Johari mansutka jaku nya lebuh dipinta ngelansa penerang dibantaika Adun Batu Lintang, See Chee How ti madahka sempekat komersial entara Petronas enggau Perintah Sarawak, Hari Satu tu tadi nadai meri penguntung ngagai rayat ba menua.

Iya dirandau pemberita pengudah bejadika Pengerami Makai Taun ke-10 Ma’had Tahfiz Tun Abdul Rahman Ya’kub (MATTARY), ditu kemari.

Kena Hari Satu tu tadi, Sempekat Komersial entara Perintah Sarawak enggau Petronas ba Kuala Lumpur nyerungkai peluang baru ngeranchakka agi pemansang industri minyak enggau gis ba menua tu.

Sempekat besejarah nya dikemata Abang Johari enggau Menteri Besai Tan Sri Muhyiddin Yassin.
-abis-

Suara Sarawak