KUCHING: Semua Adun mengkang mangku pengawa nyentuk Dun Sarawak dipadam, nitihka Perkara 18(1) Perlembagaan Negeri Sarawak, ku Speaker Dun Sarawak Datuk Amar Mohamad Asfia Awang Nassar.
Terang iya, tu beduduk ari perintah darurat agi dipejalai enggau pengawa madamka Dun udah ditangguh enggau nadai meri penanggul ngagai Ordinan Darurat (Kuasa-Kuasa Perlu) 2021.
Nya kebuah, pangku pengawa Adun bedau abis naka 6 June tu tadi.
“Sida mengkang mangku pengawa nyentuk Dun dipadam lebuh Yang di-Pertuan Agong madahka haribulan abis darurat di baruh Seksyen 15 tauka pengudah 1 Ogos 2021.
“Nya alai, pengudah 1 Ogos 2021 enggau enti sema perintah darurat enda disambung, Pengawa Bepilih Nengeri (PRN) mesti diatur seriris enggau Perkara 21(4), Konstitusyen Nengeri Sarawak 60 hari ari haribulan abis darurat kena 1 Ogos 2021,” ku iya nerang, ditu kemari.
Nambahka nya, Asfia madahka timpuh Dun Sarawak mega dilanjar nyentuk proklamasi darurat abis.
Iya mega madah udah nganjung notis pasal pekara nya ngagai Chairman Komiti Pengawa Bepilih (SPR) Malaysia, Datuk Haji Abdul Ghani Salleh nengah email kemari.
“Pengawa Bepilih Nengeri (PRN) deka diatur nitihka haribulan ke engkeman dipadahka Agong pengudah berandau enggau Tuai Pemegai Menua (TYT) Sarawak,” ku Asfia nerang.
Dulu ari nya, Asfia madah kena 25 Mei 2021, Agong ngasuh Perintah Sarawak bejalaika baka selama enggau kuasa di baruh Ordinan Darurat (Kuasa-Kuasa Perlu) 2021.
Ku iya, beduduk ari darurat dipejalai kena 11 Januari ngagai 1 Ogos 2021, kuasa madamka Dun Sarawak bepanggai di baruh bidang kuasa Agong pengudah berunding enggau TYT Sarawak.
Perkara 21(3) Perlembagaan Negeri Sarawak netapka timpuh Dun Sarawak nya lima taun ari haribulan baum keterubah.
Timpuh lima taun nya deka abis kena 6 June 2021 berindik ari baum keterubah pengudah PRN ke dulu nya kena 7 June 2016.
Reti iya, enti nitih Dun Sarawak padam pengudah 6 June 2021.
Tang ketegal perintah darurat dipadahka Agong bepun 11 Januari tu tadi enggau ngubah Ordinan Darurat (Kuasa-Kuasa Perlu) 2021, undang-undang dalam Konstitusyen Nengeri Sarawak kelebih agi bekaul kuasa madamka Dun Sarawak sereta ngatur pengawa bepilih udah ditangguh enggau nadai empas nengah Seksyen 13 enggau 15 Ordinan nya.
Asfia madah, pengawa madamka Dun enggau pengawa bepilih Dun mengkang ditangguh seagi perintah darurat dipejalai.
Taja pia ku iya, Seksyen 13 enggau 15 Ordinan Darurat (Kuasa-Kuasa Perlu) 2021 mega meri kuasa ngagai Agong ngenukuka pengawa madamka Dun enggau haribulan bepilih ba sebengkah nengeri nyengkaum Sarawak enti iya ngasaika Dun nya dipadam enggau pengawa bepilih engkeman diatur maya timpuh darurat.
