Semua atur belanja perintah nengeri patut diperati baru

KUCHING: Perintah Sarawak dipegai Kepala Menteri Datuk Patinggi Abang Johari Tun Openg diansak beratika semua atur, perambu enggau atur belanja lebuh ngatur wang Sarawak ba timpuh taun 2019 enggau 2020 ti majak ngirauka ati ditambah enggau pandemik Covid-19 ke nyadi diatu.

Nya entara jaku dibantaika Presiden Parti Sarawak Bersatu (PSB) Datuk Sri Wong Soon Koh nengah sebengkah aum pemberita ti diatur ba Opis PSB, ditu lemai tadi.

Ku Soon Koh, iya minta Abang Johari ti mega Menteri Wang beratika baru atur belanja Sarawak ti dipelanja sebedau tu nyentuk diatu.

“Nengah projek mega ti enda nyungkak ekonomi tentu deka meri pangka negatif ba timpuh panjai dalam pemansang ekonomi menua.

“Nya kebuah, projek baka Jalai Besai Kedua diperambu nya patut ditangguh tauka dikinsil,” ku Soon Koh.

Ku iya, Sekretari Wang enggau Kepala Menteri meseti beratika baru projek jalai besai kedua ti diperambu ngambi belanja menua enda dibasau ba pengawa ti salah.

“Lebuh nginsil Projek Jalai Besai Kedua, kitai ulih ngelimatka belanja RM6 bilion enggau belanja nya ulih dikena ungkup pengawa bukai baka projek pemansang menua pesisir ti patut dirumban.

“Kebuah pia laban kitai ulih ngelimat belanja menua kelimpah kitai engka enda ibuh ngena mayuh agi ‘belanja alternatif’,” ku iya.

Terang iya, Perintah Sarawak enda tau ngena belanja simpan menua laban nya nadai rikod enggau semina ulih bepanggai ba pemanah kredit Perintah Sarawak ngambi ngumpul belanja nengah pengeluar bon.

Soon Koh mega dekaka Kepala Menteri enggau Opis Wang Menua beratika baru projek sebedau tu enggau mansik projek nya ngambi enda ngena belanja menua lebih ari pematut.

Nambahka nya, Soon Koh mega bisi mantaika tanda ekonomi nurun baka untung ari peratus eksport labuh, kurang peminta barang enggau servis, nadai penatai pemisi laban mayuh dagang nadai beoperasyen ketegal Covid-19 enggau Atur Tagang Pejalai (PKP).

Nya alai, iya minta Perintah Sarawak beratika baru projek mega mungkur tiga Ejensi Pemansang iya nya Kaunsil Pemansang Ulu Rajang (URDA), Kaunsil Pemansang Tanah Tinggi (HDA) enggau Kaunsil Pemansang Kandang Menua Utara (NRDA) ti ngena belanja penyampau RM4.5 bilion.

Tu nyengkaum projek LRT (Light Rail Transit) tauka ART (Auntomatic Rail Transit) nyengkaum loji hidrogen enggau bas hidrogen nya projek bukai ti patut diperati baru sebedau dipejalai laban projek nya ngaul pemansang menua.

Kelimpah ari nya, iya mega merambu Aum Besai Dun kena 11 Mei tu diatur beberapa hari ngambika jurai pasal pekara nya ulih dipejalai enggau manah.