KUCHING: Sapit Premier Datuk Amar Douglas Uggah Embas bisi endar pengandal lebuh projek Ejensi Pemansang Bagi Menua Betong (BDDA) mujur dipejalai deka meri penguntung ngagai mensia mayuh.
Iya ti mega Chairman BDDA madah, nya mega deka ngerandang peluang dagang ngagai mensia mayuh ba sitak nya ila.
“Kami udah selubang penemu pasal rintai projek BDDA di baruh pejalai pelin renggat kedua.
“Kelimpah ari nya, kami mega udah ngatur randau lenak pasal sebarang pekara bekaul enggau pejalai pelin nya,” terang iya.
Uggah bejaku munyi nya lebuh bejadika Pengawa Nutup Bengkel Nyerenih Rintai Projek BDDA Renggat 2, ditu kemari.
Ngenang silik agi ku iya, sida dekaka semua projek ti dipejalai ila ulih tembu nitih ke timpuh enggau spesifikasi.
Iya madah, sida mega udah ngaga pemutus ni bagi opis enggau ejensi perintah ti pemadu patut dilempai bejalaika pengawa nya.
Sama datai KabanParlimen Betong Dr Richard Rapu, Kaban Kunsil Nengeri (ADUN) Layar Datuk Gerald Rentap Jabu enggau ADUN Saribas Mohd Razi Sitam.
