SERIAN: ‘Aku suba pan siku penyakal, aku ngumbai ubah nya manah tang sepengelama 22 bulan (Pakatan Harapan megai perintah) semua ti dijuluk nadai nyadi nyata,” ku Kaban Parlimen Puncak Borneo Datuk Willie Mongin.
Nya alai, ku Willie arapka rayat terus nyukung GPS awakka perintah menua tu terus tegap.
“Kitai udah ngasai pemedis beganti perintah nyau tiga kali ti meri pangka ngagai dagang enggau ekonomi menua.
“Nya alai, aku mai kita negapka perintah ti udah bisi awakka menua tegap,” ku iya ba aum pemberita pengudah Bejadika Pejalai Agrikomoditi Malaysia Sebilik di Balai Balu Tayung Langui, Kampung Piching Tebedu ditu, kemari.
Dulu ari nya, Willie ke mega kaban kaban Parti Pribumi Bersatu Malaysia (Bersatu) bisi dipinta meri penemu bekaul enggau pemutus penyandang Dun Krian Datuk Ali Biju ti udah nginsil diri nyadi chalun bediri minta pilih ba Dun Krian.
Ku iya, Ali enda ulih ditangang bediri ngetanka penuduk iya, tang pekara nya patut dipeda ba perati ti lebih besai.
“Enti dipeda ba sukut aum parti Bersatu pemutus Ali deka bediri nya sigi enda engkeman taja pia nya bepanggai ngagai hak siku-siku.
“Kami udah diberi lalau ari Presiden parti (Bersatu iya nya Tan Sri Muhyiddin Yassin) patut mantu semua chalun Gempung Parti Sarawak (GPS) ba Pengawa Bepilih Besai Nengeri (PRN-12) tu.
“Nya sempekat ti digaga presiden parti (Muhyiddin) enggau Kepala Menteri (Datuk Patinggi Tan Sri Abang Johari Tun Openg),” ku iya.
Nangkan ke nya ku iya, sida (Bersatu) patut bekerejasama ungkup kaul enggau penegap politik ba renggat nengeri enggau perintah besai.
“Enti meda ba polisi parti (nadai sempekat) endang kitai deka berunding baka nya (ngambi bagi bediri). Tang kitai patut meda tuju ti lebih besai.
“Aku ari pun endang udah mantaika penemu sigi nyukung chalun GPS ba sitak Parlimen aku (Puncak Borneo) empu iya nya Dun Serembu, Mambong enggau Tarat,” ku iya.
Sapit Menteri Pengawa Bekebun enggau Komoditi nya sekali agi madahka, pemutus iya enda kala berubah sereta tegap.
“Enti aku madah utai nya, nya meh iya, enda berubah.
“Dalam dunya politik nadai utai adil, nya alai kitai ti nyadi kaban politik meh ti bebendar ngetanka pekara adil awakka ulih nyadi nyata,” ku iya nyaut tanya pemberita ti ngumbai pemutus Ali narit diri bediri nya dipeda enda adil ngagai Ali empu sereta meri pangka politik ngagai seduai ungkup Pengawa Bepilih Besai (PRU-15) ti deka datai.
-abis-
