PENGAWA ngaga Kompleks Opis Unit Pengarap Bukai (UNIFOR) entara juluk besai Kepala Menteri, Datuk Patinggi Tan Sri Abang Johari Tun Openg.
Sapit Kepala Menteri ti mega Menteri Bekuasa ba UNIFOR, Datuk Amar Douglas Uggah Embas madahka projek ngaga kompleks nya ditibak ari penemu Kepala Menteri empu.
Ku iya, RM70 juta ti udah diagih nyata mandangka penyiru Abang Johari lebuh nyaga pemanah kaul serakup pupu bansa ti nguan menua tu.
“Tu nyadi siti ari turai sejarah besai ngagai UNIFOR, ungkup semua rumah sembiang ke bisi ba menua tu.
“Agih belanja ke besai nentuka perambu kitai ulih dipejalai baka ke udah ditetap,” ku iya maya Pengawa Nasih Tanah Kompleks UNIFOR Sarawak ba Jalai Ong Tiang Swee, Kuching.
Uggah madah, kompleks nya deka nyadi lambang penyerakup pupu raban bansa ti bepegai teguh ba jalai pengarap diri empu di tanah Kenyalang.
“Endur ti chukup strategik enggau ngemuntangka kitai ngatur pengawa.
Endur baum dua ringkat, balai makai umbas endur 1,000 iku temuai, endur ti lantang enggau bisi perabung sereta palan komersial,” ku iya.
Ungkup penemu, Sarawak nengeri ti keterubah di Malaysia bisi unit ke megai tanggungpengawa nyaga pekara jalai pengarap rayat ukai Islam.
Abang Johari empu udah meri jamin perintah nengeri keran sereta enda bechiping enggau semua rayat, lalu penumbuh UNIFOR ngayanka pengeran perintah nengeri mantu jalai pengarap bukai kelimpah ari Islam.
Nambahka nya, Uggah madahka nengeri tu ti diiring perintah GPS bejalaika pengawa ngambi nadai sekat ba peneka megai jalai pengarap lalu terus nyadi penegap demokrasi menua.
UNIFOR mandangka polisi inklusif Perintah Sarawak nengah pengawa nyendiaka geran dikena bejalaika pemansang fizikal, kereja ngemanah tauka nyeruri rumah sembiang pupu bansa ngena belanja ti diberi.
Agih belanja ari perintah nengeri dikena bejalaika pemansang infrastruktur rumah sembiang enggau perengkaguna bukai ti bekaul ba pemansang Infrastruktur.
Tu nyengkaum ngaga endur besembiang, rumah endur Paderi, Tadika, Sunday Schools, Palan Parish, Palan Seminar, Balai Mayuh Guna enggau ngemanahka rumah sembiang ke bisi diatu, paking, nukar sambung tali karan enggau ke bukai.
