KUCHING: Sarawak keran ngalih enggau ngemansang perengka pengangkut mensia mayuh ti ngena kuasa hidrogen enggau entukar elektrik (EV) ba taun 2023.
Premier Sarawak, Datuk Patinggi Tan Sri Abang Johari Tun Openg madah, pekara nya sebagi ari pengawa sida ke deka ngubah Kuching, kelebih agi ngambi nadai karbon seraya nyadi mengeri pintar.
“Kitai bisi pengangkut mensia mayuh tauka bas hidrogen, kitai mega ngasilka hidrogen.
“Pelaba aku, manggai ba taun 2030, nyau deka semua perengka pengangkut mensia mayuh ba menua tu ngena hidrogen enggau EV.
“Maya nya ila, kitai ngarap mengeri besai Kuching udah beresi sereta nadai mansut karbon,” ku iya.
Abang Johari nibar jaku nya ba Pengerami Makai Lemai Gala ‘Shape the World Summit Programme 2023’ ba Hotel Pullman Kuching, ditu ensanus.
Abang Johari madah, diatu mega Sarawak benung ransing ngalih ngagai ekonomi gadung nyengkaum hidrogen laban nya mega siti chara dikena mutar ubah klimet di dunya.
Ku iya, enda ulih disakal iya nya pengawa ngasilka hidrogen nya ngena kuasa ti tinggi tang ulih dikurang ngena teknologi enggau inovasyen.
“Aku temegah ati madah, ba bulan nyin tadi, aku bisi nemuai ngagai Palan Pemansik Petroliam Nasional Berhad (PETRONAS) di Bangi, sida udah mujur ngurang kuasa dikena ngasilka hidrogen ari 60 kilowatt sejam (KWh) ngagai 40 KWh.
“Maya kitai nyingkang jauh agi udah tu, nya engka ulih dikurang ngagai 30 KWh lalu kitai mega ulih mansut mayuh agi hidrogen,” ku iya.
Nangkan nya, iya nyemetak madah, semua pengawa ti dikereja Sarawak diatu mega nyadi chara mutar ubah klimet.
“Kitai bisi pemansut kuasa ulih dikemaru baka hidrogen, kitai mega bisi solar, diatu bisi agi solar enggau angin (solar champur angin).
“Udah tentu tu pengeraja asal kitai, lalu kitai ngena pengelebih tu dikunsi enggau dunya, nyengkaum dikena mutar ubah klimet ba dunya diatu,” terang iya.
Sama datai Sapit Premier Sarawak, Datuk Seri Dr Sim Kui Hian, Sapit Menteri Kuasa enggau Pemeruan Rampa Menua, Dr Hazland Abang Hipni, Sapit Sekretari Perintah Sarawak (Perambu Ekonomi enggau Pemansang), Datuk Dr Muhammad Abdullah Zaidel, Tuai Pegawai Eksekutif Gerup TSG Green, Datuk Chris Chung, sereta bala bukai.
