Semua rayat bulih pemaik


KUCHING: Pemutus Kepala Menteri Datuk Patinggi Abang Johari Tun Openg neruska Projek Jematan Batang Lupar ngayanka iya siku ketuai ti betatika ra
Kaban Parlimen Santubong, Datuk Seri Wan Junaidi Tuanku Jaafar madahka infrastruktur tu beguna amat ngagai rayat Sarawak laban ulih nyungkak pemansang ekonomi enggau penatai pemisi sida.

“Aku meri besai terima kasih ngagai Kepala Menteri laban udah neruska Projek Jematan Batang Lupar ti udah dikinsil Pakatan Harapan (PH),” ku iya.


Wan Junaidi ti kala nyadi Kaban Parlimen Batang Lupar madahka sitak baka Sebuyau enggau Triso nya ngembuan pengelebih iya empu.


“Aku andalka infrastruktur tu ukai semina meri pemaik ngagai peranak semak Batang Lupar aja tang mega ngagai semua rayat Sarawak.
“Pia mega, projek nya deka ngerumban pemansang ba kandang tebing tasik,” terang iya.


Ku iya, Batang Lupar endang ditemu begelumbang maya musin landas.
“Lebuh sekula ba Triso ditutup ujung 1980-an, mayuh anak mit badu sekula ketegal penusah baka tu.

“Tu ngujungka mayuh anak mit suba tinggal pelajar,” ku Wan Junaidi.


Iya madahka berapa taun udah nya, servis feri dipejalai nyambung atas Meludam ngagai Sebuyau enggau Sebangan.


Tang ku iya, agi bisi pengelemi lebuh kitai bekenaka servis feri tu.
“Taja pia, projek Jematan Batang Lupar deka mutarka penanggul tu sereta juluk ati rayat ba sitak nya deka nyadi nyata,” ku iya.

Suara Sarawak