Sepil jaku Iban standard

BELAJARKA jaku sigi nadai kala pulaika pengerugi. Mayuh agi jaku ditemu nyamai agi ga kitai bejaku, berandau tauka berkomunikasyen enggau orang bukai ti nemu siti-siti jaku.

Baik nya jaku English, Melayu, Iban, China, India, Jerman, Jipun enggau ke bukai di dunya semua nya endang manah.

Taja pia dalam kitai belajarka sesebengkah jaku tu tadi tentu mega kitai patut nitih tauka ngena atur sepil ti standard kelai penyiru sereta basa ngagai jaku nya.

Kemaya hari tu, chukup mayuh perengkaguna teknologi ti ngadaka bemacham aplikasyen media rama ti ngemuntangka mensia mayuh berandau enggau pangan diri.

Ambika banding baka Facebook, WeChat, Instragram, Telegram, WhatsApp enggau ke bukai.

Semua tu tau dikena berandauka sebarang pekara tauka isu asal enda mangki sensitiviti orang bukai.

Tebal agi jaku ti suah ayan ba media rama nya, endang nadai orang mantis. Ukai baka surat kabar, bup chelak tauka berita online ti endang udah dipantis raban editor.

Ni utai ke deka disebut terus tulis, baka orang ti makai empa aja ni utai ke dipeda nyamai lalu pia mega sida nulis utai, nama aja pekara ke mansa runding terus ditulis nadai ngira sepil jaku nya betul tauka salah.

Terunda-runda ngemuntang jaku

Lebuh aku ngelansa sebengkah gerup ba laman Facebook, Ruai Jaku Iban dia dipeda sebana siku penguna ngelar diri Bunsu Remaong madahka jaku Iban makin lama makin lenyau.

Ku iya, jaku Iban makin lama makin bebali nadai temu menuku. Sepil jaku udah jauh temejuh ari jalai ke bendar. Salah sapa?, ku iya.

Entara sepil jaku Iban ti balat dipejah unggal tu iya nya sepil leka jaku aku nyau dipuntang nyadi ‘qhue’, bisi (bc,vc), orang (uwg), sapa (chapa), aja (jx), dik (dx), baru (bwu), ga (qax), Au (aox) enggau sayau (chayau),” ku iya.

Tentu bisi agi lebih ari ke dirintai nya ke dipeda mua mata kita bukai. Baka ni nasit jaku kitai Iban dudi hari?

“Semua nya bepanggai ngaga bansa kitai empu. Enda sinu ati kita menyadi beratika jaku Iban kitai,” ku iya.

Nyadi sebana nya endang amat bisi nyadi dikena mensia mayuh nyangka nya deka berumban, tauka buruk deka nyepil panjai.

Timbal siku penguna Facebook madah enti sepil baka nya majak dikena, iya sigi enda nemu sekali macha jaku tauka sepil ti baka nya.

Siku agi penguna ti ngena nama Galing Beginda madah, aku tachat maya macha tulis baka nya. Bebelit dilah deka nyebut, anang agi au nyau nyadi ‘aox’, ku iya.

Chukup mayuh timbal ari penguna Facebook ke bukai lalu majoriti sida endang mejah chara nyepil jaku Iban ti salah baka nya tauka sengapa puntang.

Enda jauh endur manding maya musim pengerami Gawai tu tadi. Bisi nya nyepil Selamat ‘Ari’ Gawai. Kebendar sepil ke betul iya nya Selamat Hari Gawai.

Arapka dudi hari kitai Iban bela belematika pekara tu lalu enda terunda-runda ngena sepil ti salah sekalika nya ba media rama tauka ba lirik lagu Iban.

Sistem Jaku Iban Di Sekula

Diatu kitai endang udah bisi sistem jaku Iban ke diguna di sekula dichelak Opis Menteri Pelajar Malaysia (KPM) taun 2007 lalu dalam sistem nya ngerintai chara nguna fonologi, morfologi enggau sintaksis ke betul ungkup semua renggat sekula.

Bisi lima kriteria sepil jaku Iban, kesatu prinsip linguistik iya nya pelasar ke pemadu beguna lebuh merambu siti-siti pengawa ti deka ngasuh jaku nya standard baikka ari sukut sistem enggau struktur fonologi tauka ari sukut struktur jalai jaku.

Taja pia, pengentap sistem sepil jaku Iban enda ulih beduduk penuh ngena prinsip tu ketegal bisi ngembuan pengaya jaku enggau penyelai enti dibanding enggau jaku bansa bukai.

Kedua iya nya jaku Iban bisi penulin kediri empu ti mandangka iya ukai beduduk ari jaku bukia.

Taja pia, chuan sepil jaku Iban enggau jaku Melayu bisi bekabih ketegal kededua jaku tu sebilik dalam jaku seperugan.

Kriteria ketiga penyedang. Jaku Iban sekalika nya jaku asal tauka jaku injau endang ditulis ngena urup Roman.

Tu betuju ngambika iya mudah dipereti lalu dikearap ulih dipelajar tauka dikerembai ngagai bansa bukai.

Udah nya keempat pengelentur jaku Iban ba tikas ti benung ngerembai mansang ari semua sukut.

Nya alai, dalam sistem jaku Iban digaga enggau naka ulih setipak enggau pemansang kemaya hari tu ngena chara berinjauka jaku bansa bukai dikena napi segang pemansang dunya sains enggau teknologi.

Kriteria kepenudi mesti pratikal dikena ba sebarang alai enggau maya lalu diterima semua orang ke belajar enggau pengajar jaku Iban sereta nemban dikena lalu nadai pulaika penanggul.

Nya alai diatu kitai ke ngaku diri Iban anang sesekali ngumbai diri enda nemu jaku Iban sereta naka ulih seliah ari ngena sepil ke salah laban jaku tu mih ulih nyadi ke tanda kitai nya Iban.

Keba suah amat didinga orang nyebut rambai jaku,… dikelala buah ari langgu, dikelala daun ari kayu, DIKELALA BANSA ARI JAKU.’

Suara Sarawak