Sepital Kapit nerima mesin ventilator ari WTK Group

SIBU: WTK Group udah meri seunit mesin ventilator berega RM129,000 ngagai Sepital Kapit pagi tadi.

Direktor Datuk Seri Patrick H.Y. Wong madahka sekeda kereban mesin nya dipelaba datai ba sepital nya ari Kuala Lumpur kandang dua minggu agi.

Ku iya, serikat sida sebedau tu mega udah meri belanja penyampau RM2 juta ngagai Komiti Penyangga Penusah Nengeri Sarawak (JPBNS).

“Kelimpah ari belanja, kami bisi meri dua unit mesin ventilator ulih mindah kin kitu berega RM98,000, seunit mesin Real Time Polymerase Chain Reaction (RT-PCR) berega RM155,000 enggau lima unit peti ais endur nyimpan chunto lendir liur Covid-19 berega RM9,350 ngagai Sepital Sibu,” ku iya.

Wong madah, pemeri nya entara program dilangkar nengah Program Tanggung Pengawa Rama Korporat (CSR) sida sekumbang pengerekai pandemik COVID-19 ba menua tu.

Menijar Opis WTK Group, Justin Tiong nyuaka mesin MyK5 & Savina 300 Classic nya ngagai Direktor Sepital Kapit, Dr Ivan Vun ba sebengkah pengawa diatur ba sepital nya pagi tadi. – BERNAMA

Suara Sarawak