Sepital Tambah ATM di Kapit dibuka berengkah pagi ila

KAPIT: Sepital Tambah ATM di Kapit berengkah beroperasyen 10 Mei (Hari Satu) tu dikena ngubat mensia mayuh ti ukai napi penyakit Covid-19.

Sapit Kepala Menteri Tan Sri James Jemut Masing madahka Kapit entara pelilih menua ti pemadu jauh ari mengeri.

“Nya alai aku meri terima kasih ngagai raban Soldadu Malaysia (ATM), Opis Pengerai Malaysia (KKM) enggau semua raban bekaul laban bebendar nyaup Kapit nagang pengerekai penyakit Covid-19.

“Gaya enggau pengidup bansa Dayak di Kapit enda entu ulih nagang pengerekai penyakit Covid-19 laban endang gaya pengidup ti sigi udah teleba berimbai,” ku iya.

Masing bejaku munyi nya ngagai pemberita lebuh ngelawa Sepital Tambah ATM Kapit ditu, kemari.

Ku iya, gaya pengidup nya ti ngasuh pengerekai penyakit Covid-19 amat jampat.

“Naka diatu, sida madah ke aku kemari (ensana) ba Bagi Menua Kapit aja bisi 340 kes positif Covid-19 dirikodka.

“Nya penyampau ti mayuh lalu kami nadai chukup perengkaguna baka katil, bengunan perintah enggau ke bukai.

“Terima kasih ngagai Balai Mensia Mayuh Kampung Melayu ti udah nyali palan tu nyadi Sepital Tambah ATM Kapit,” ku iya.

Iya ngarapka dalam beberapa bulan ti deka datai kes positif Covid-19 di menua tu ulih dikurangka.

Sama bisi datai Sapit Menteri Pengerai ll Datuk Aaron Ago Dagang enggau Panglima 1 Divisyen Mejar Jeneral Dato’ Dzulkafli Mustaffa sereta Panglima 9 Briged Brigedier Jeneral Shamshor Jaafar.

Ku penerang, sepital nya bisi nyendiaka 40 buah katil ngagai pesakit dalam siti timpuh.

Bantu ari raban Soldadu Langit (TUDM) mai aset pengerai ari Kuching enggau Kuala Lumpur udah diproses nyengkaum mai 35 iku raban Lain-lain pangkat (Pemantu Pengerai) kia.

40 BUAH KATIL…Pendiau katil endur merubat pesakit ba Sepital Tambah ATM Kapit.

Suara Sarawak