Sepital tambah di Kapit disadang tembu seminggu

KUCHING: Raban Soldadu Malaysia (ATM) benung kiruh ngaga sepital tambah (penabat) di Kapit.

Direktor Opis Pengerai Sarawak Dr. Chin Zin Hing madahka pengawa sida nya disadang tembu dalam timpuh seminggu.

“Raban ATM udah ngepunka pengawa ngaga sepital tambah ba Kapit din.

“Enti nadai utai nanggul lalu semua pengawa lanchar, sepital nya dipelaba ulih tembu dalam seminggu,” ku iya lebuh dirandau, tadi.

Dr. Chin madah baru, tuju pengawa sida ngaga sepital tambah nya nyadika penabat dikena nangkup penanggul Sepital Kapit sekut.

Tambah mega ku iya, sepital tambah tu nerima bala pesakit ti ukai kena rampit Covid-19.

“Sepital tambah tu ungkup pesakit ti ukai dirampit Covid-19 ngambi katil ba Sepital Kapit chukup endur berubatka pesakit Covid-19,” terang iya.

PENABAT… Kereban dikena nyikap sepital tambah ba Kapit.

Suara Sarawak