Serakup mai pupu bansa begempung

ROBAN: Serakup ngempung kaul rat enggau pangan diri nadai ngira bida penatai asal bansa enggau jalai pengarap.

Ku Kaban Parlimen Saratok Ali biju, kitai patut ngedutka pemanah tanggam kaul begulai pulaika pemaik semua ngemujurka sebarang pengawa dikereja begulai.

“Penemu nanahka siti bansa tauka rasisme enda patut dikembuan kitai ti diau ba menua diuan pupu bansa enggau megai pengarap bebida.

“Enti kitai ngembuan runding enggau penemu baka tu tau ngasuh kitai pambar ngujungka kitai enda sepenemu sereta sejalai lalu pengerugi pulai ngagai kitai empu,” ku Ali ti mega Kaban Kunsil Nengeri (Adun) Krian.

Jaku Ali dibacha Kaban Pengatur Pengawa Palan Servis Komuniti Saratok, Walter Changgai lebuh bejadika Pengerami Makai Lemai Gerija St.Paul Roban kena Hari Enam tu tadi.

PENGINGAT… Walter nerima tepa ari piak gereja seraya dikemata Aries Sumping Jinggan enggau bala temuai dipebasa bukai.

Ali mega madahka diri lantang ati meda peneguh kaul serakup dikemeran rayat di sitak parlimen iya ke alai sida ulih idup bebasa enggau bebatak asur enggau pangan diri.

“Aku rindu meda rayat ditu ulih begempung ngereja pengawa ari sanding penemu bala ketuai sereta ulih segulai sejalai ngemujurka atur pengawa nguing ngagai siti tuju, dekaka diri diau lantang enggau likun.

“Nya alai aku chukup lantang ati sereta meri puji ngagai bala komiti pengatur pengerami malam tu ti udah mujur ngempung rayat datai sampal begempuru ditu,” ku iya madah nyemetak.

Berebak enggau nya, Ali bisi ngemendarka agih belanja penyampau RM7,000 dikena nyaup komiti gerija ngatur pengawa dudi hari.

Ku Ali, tu kelai sukung iya ngagai pengawa gerija ti dikeandal nyeridi, ngembing enggau nempa bansa ti menyana.

Sama datai Bishop Areis Sumping Jingan, disempulang Paderi Revd. Phillip Mang sereta 400 bala bukai datai ari genturung pendiau besemak.

Suara Sarawak