Serakup Ngasi Sarawak: Jaguh Gendang Pampat

KUCHING: Ngetanka gelar champion ukai pekara muntang lalu begunaka pengeransing enggau disiplin tinggi.

Ku Presiden Serakup Ngajat Asal Iban (Ngasi) Sarawak, Ajat Sumoh, pemujur tiga taun bejurut menggi gelar ‘jaguh’ Gendang Pampat endang bepanggai ba semengat kerejasama siti tim ti tegap sereta pechayaka pangan diri.

“Bula ngumbai diri nadai penangi maya deka bepekit. Ati kesal sigi bisi nandang tang kami sebuat ngeringka semengat diri ari pechaya enggau pengandal pengeransing deka mansutka asil.

“Ari nya kami nadai masau jam belatih, endur ngansah pengelandik enggau pengelanchat nempap gendang pampat nentuka tiun enggau rentak enda lari ari ke asal.

“Tambah mega ngira tim kami ngemai gelar champion sebedau tu, naka ulih ngetanka gelar nya,” ku Ajat lebuh dirandau Suara Sarawak.

GAP… Ajat (lima kanan) begambar enggau Tim Tajai Bekumbai Ambai.

Ku iya, taja macham pemar ditapi belabuh ari ngiring enggau ngajar rebak baru nampung main asal Gendang Pampat tu, sida mega nempa rebak ti angkunka pesaka tuai.

Nya alai ku Ajat, Akademi Ngasi Sarawak numbuhka tim Gendang Pampat sida keterubah dalam bulan Januari 2017 suba.

“Penyampau tubuh bala dalam tim tu iya nya tujuh iku ari Kelas Gendang Pampat kohort Ke-1/Januari 2017.

“Kelas tu diatur ninting lemai Hari Lima, urung 2 jam pengelama lalu belebuh mega diatur Hari Minggu pengudah Kelas Ngajat tembu ke alai semua kelas tu diatur ba premise Serakup Ngasi Sarawak empu.

“Tim pemungkal mujur teulihka gelar Champion Pekit Gendang Pampat 2017 di Sekula Primari (SK) Melugu,” terang iya.

MINTA ADING PETARA… Tim Tajai Bekumbai Ambai nyikap Gendang Pampat sida sebedau nurun bepekit.

Udah nya ku Ajat, Kohort Ke-2 ngepunka kelas sida dalam bulan Oktober 2017 lalu tembu Januari 2018.

Sida betubuh semilan iku ba renggat kedua nya nandu pemujur raban keterubah menggi gelar Champion Pekit Gendang Pampat 2018 SK Melugu.

“Tim Kohort Ke-1 enggau Kohort Ke-2 lebuh nya bedau bisi pejuluk, bedau bisi nama. Kedua-dua tim tu semina diberi nama Raban Gendang Pampat Serakup Ngasi Sarawak aja.

“Lebuh Kohort Ke-3 diambi belajar dalam bulan June/Julai 2019 baru bisi ensumbar diberi, Tajai Bekumbai Ambai.

“Serak tu kami sebuat ransing agi ati lalu nyikap diri bepekit lalu ngetanka gelar champion laban sedarka tanggungpengawa besai nganti kami betubuh 10 iku.

PENUH ADAT… Piring dipanggai atas teresang ti diengkah ba tengah panggau ngading tempap Gendang Pampat.

“Kelas berengkah diatur kena 6 Julai lalu tembu 30 September tu tadi, ninting lemai Hari Minggu ba premise Ngasi Sarawak lalu suah mega ba rumah pematih kena malam Hari Lima, nitihka penemu bala mayuh,” ku iya ngelansa pejalai tim sida dataika Tajai Bekumbai Ambai ditumbuh.

Kelimpah ari nyikap diri ngetanka gelar champion, tim sida mega suah dikangau merindang ba sekeda program enggau pengerami ke bisi diatur ngelingi mengeri Kuching ditu.

Empai lama ke udah, sida dikangau mantaika Gendang Pampat beserimbai enggau Pejalai Gempuru Serakup Bansa 2019 (HiPER’19) ba Palan Besai Bebelika Barang MYDIN, Petra Jaya ti diatur Opis Pengerejista Gerempung (ROS).

“Kami mega bisi dikangau merindang bala pengabang ba pengerami makai lemai gerempung ukai dikuasa perintah (NGO) bukai enggau pengerami melah pinang kelai basa seraya ngetanka main asal.

“Peneleba merindang mensia mayuh tu ke bendar meri kami bisi agi pengandal ngagai diri empu kelimpah ngalus enggau ngemanahka agi tempap gendang,” ku iya madah nyemetak.

BERAUH… Tempap gendang pampat Tim Tajai Bekumbai Ambai ngasuh bala mayuh ngenung.

Ngelansa sentang tempap gendang pampat ke dipelajar ba Akademi Serakup Ngasi Sarawak tu endang Tempap Asal Gendang Pampat.

“Reti iya genap tempap bisi penama, bisi pejuluk ukai sebarang tempap lalu mayuh amat tim gendang pampat diatu mandangka tempap gendang pampat etnik kreatif enggau tempap gendang pampat kontemporari aja.

“Tu ukai asal tempap gendang pampat kitai Iban, nyau udah mayuh dibalut rentak moden. Nya kebuah kami keran ngetanka tempap asal gendang tu nangika iya tau punas jemah.

“Ari nya mega serakup kami netapka tuju enggau juluk seruran nyaga, ngintu enggau ngetanka tempap asal Gendang Pampat Iban kelimpah ngemeranka penulin Ajat Asal Iban.

“Kami endang enggai sereta enda deka ngajar bala nembiak ba akademi tu main asal kreatif enggau kontemporari tauka dikumbai rebak kemaya hari kreasi baru.

“Enti sema orang bukai enggai ninga, enda manding dipeda lalu ngumbai main asal ditampung kami tu udah tinggal jeman, enda nitihka segang pemansang, kami tetap nitihka penemu diri.

“Kebuah pia laban tu mih gaya, tiun enggau rentak main asal ti ditampung kitai ari aki ini menya. Enti nyau dipegulai enggau liuk seni bukai, nyau enda tulin agi.

“Nya alai, kami enda ulih dikemula tauka dikelakar bala akim ti dipadu ngakim siti-siti pekit. Ukai reti kitai tinggi penemu, pemintar lebih ari sida tang laban kitai bebasaka pesaka asal aki ini diri empu,” ku Ajat.

Ngenang sukung tegut bala tim enggau komiti serakup ngujungka sida nempa pemujur serak tu, Ajat meri terima kasih besai ngagai semua sida.

“Nadai jaku bukai ulih dikena aku mantaika pengaga diri kelimpah ari jaku puji enggau terima kasih ngagai semua.

“Tabi puji sereta basa ke ngagai unggal Roden Sada, Jeremy Frank Joseph, Alexander Mike Labut, Jarry Sangga, Alvin Lungan Alexander Blassan, Lavigness Valen Sabi, Franky Anak Pura, Sada Tinggak enggau Darrent Jepun.

“Taja kami tu baru begulai ba Akademi Ngasi Sarawak semina tiga bulan aja tang nadai ngadang diri ulih ngetanka gelar champion taja tagit sigi bisi.

“Bulih gelaran tu nyadi kenang chukup manis ngagai genap iku kami nyengkaum bala komiti bukai.

“Kami chukup iya gaga laban serak tu kami endang keran nanka gelar champion tiga taun bejurut.

“Serakup Ngasi Sarawak champion Pekit Gendangg Pampat 2017 enggau 2018 sereta sekali agi mujur nanka gelar nya ba taun 2019.

“Pemenang tim Tajai Bekumbai Ambai tu datai ari sukung, bantu, saup enggau disiplin tinggi tim gendang pampat, ke mega udah begulai baka diri sebilik.

“Nadai belampung tulang gawa berengkah ari nyendiaka pemakai enggau ai irup, ngatur kelas dataika hari pekit nyadi. Semua tu nyadika peransang kami nyapai penyulut.

“Krew tim kami tu mih ke bendar nyadi tulang belakang ngatur kereban, nganta, tukang gambar enggau ngambi video, ngintu pemakai sereta macham pekara bukai nentuka pengelantang semua,” ku Ajat temegah mega kerejasama rat entara sida.

Sida ke nyadi tulang belakang tim Tajai Bekumbai Ambai iya nya Nera Sangga, Bata Achik, Danita Tian, Melikem Jambai, Nora Nayah Bundoi, Octavia Alexa Darrent, Cynthia Tiong Crepin, Bajik Franky, Issac Alexander enggau Elvira Alexa Darrent.

“Tiap kali sepengudah aktiviti tauka program mujur diatur, kami berami makai serumpu baka potluck BBQ enggau Kareoke kena ngenang jasa enggau ngerami pemenang diulih.

“Maya tu, semua kaban mega deka dibai berami begulai ba premise Serakup Ngasi Sarawak ditu seraya ngedutka tanggam kaul sereta bekunsika mayuh leman cherita.

“Suah mega kami ngatur Hari Diri Sebilik, Pengerami Makai Lemai Ngenang Jasa ba hotel sereta disempulang enggau aum bala komiti enggau main, pekit karaoke, pekit ngajat, pekit bukai, tanda entara bala kaban serakup aja,” terang iya silik.

Nya alai, barang sapa deka belajarka main asal baka ngajat, gendang pampat enggau kelas nengkebang terabai, gendang enggau ke bukai endang diperansang datai laban mayuh pemaik diulih ari kelas nya.

“Kelas main asal disedia kami endang tulin, nadai dibalut seni moden lalu kita enda rugi belajarka iya.

“Kita deka seruran dilatih datai ba tikas ke dikedeka kita empu. Kebuah pia laban orang ke beramat-amat ka sertea rindu ke Main Asal Iban ulih rejister nyadi kaban Ngasi Sarawak lalu ulih belajar main asal dikedeka kita dataika landik.

“Kami ditu endang enda ninggalka kita, enda nejuka kita ke udah belajar ba akademi laban kita deka diambi nyadi kaban.

“Kita mih deka nampung main asal tu ngagai rebak dudi, bersaup nan sereta ngerembaika main asal kitai bansa.

“Kita ulih telafon ngagai lumur telefon aku empu, 0128747342 tauka 0138131387 enti deka penerang enggau tanya silik pasal kelas enggau pejalai program bukai serakup,” ku iya meransang.