Serakup Ngasi Sarawak Majak gah nyingkang ke mua

KUCHING: Pemungkal Serakup Ngajat Asal Iban (Ngasi) Sarawak Ajat Sumoh mujur ngetanka penuduk presiden serakup nya rambau Aum Besai Ninting Taun (AGM) Ke-3 2019.

Ajat mega udah dipadu nyadi chairman mendam serakup Ngasi Sarawak pengudah dipesetuju semua kaban lalu disaup Sekretari Dipebasa Nera Sanggah enggau Tukang Wang Dipebasa Lulu Joshus.

Sida tiga ti mungkal serakup bela mujur ngetanka penuduk diri enggau menang di darat ke alai penuduk nya enda diperebut sereta disukung tegut kaban bukai.

Kaban bukai udah dilempai mangku pengawa Magdeline Nasim (Penulung Sekretari), Darrent Jepun (Penulung Tukang Wang) enggau Alexander Labut (Pemesai Audit Dalam) sereta lima Kaban Komiti iya nya Fecilila Jepun, Danita Tian, Franky Pura, Wallace Justin enggau Jarry Sanggah.

Ku Ajat, serakup Ngasi Sarawak ditumbuh ba taun 2015 lalu udah direjista enggau dikemendarka Opis Pengerejista Gerempung (Ros) kena 9 March 2016.

TANDA BASA… Malcom Mussen nerima tepa ‘Replika Gendang’ ari Ajat kelai basa ngagai tuai pengabang pengerami lemai nya.

Sekeda ari rintai pangku pengawa serakup tu ku Ajat, sebuah serakup ti bekunsi enggau ngerembaika penemu enggau pengelandik main asal bansa Iban baka ajat, tabuh enggau kuntau nengah kelas ti diembing pengajar bepenau.

“Serakup tu mega bisi ngatur bengkel, kus ngaul pengawa pengelandik jari ungkup serap umur, indu enggau lelaki bela ampit.

“Pekara tu beguna amat nentuka main asal kitai enda lenyau lalu ulih diangkat ngagai renggat entarabansa kelimpah nyadi kelai bansa ba mata dunya,” ku Ajat madah nyemetak.

Juluk serakup tu deka nempa sebengkah serakup ti nempa peranak menua gawaka bansa, ngembuan basa enggau ulah ti meruan, daya idup ngasika ajar sida ke tuai sereta idup dalam komuniti ti diau lantang enggau bebaik enggau pangan diri.

Nya kebuah ku Ajat, sida naka ulih meransang bala ke tuai ngajar enggau ngembiak rebak nembiak ngambika penau enggau pengelandik jari ulih disabang lalu ditampung dataika jemah.

AGI REGAS… Tuai Sibat (kiba) enggau Tuai Sada (kanan) ngajar nempap gendang pampat.

“Ba aku empu naka ulih matak kaul sida ke tuai ti tau enggau landik jari nengkebang kereban lama kitai Iban baka terabai, gendang, gagung, lesung enggau bungai papan ari sumbuk beru.

“Tu mega nyengkaum pengawa sida ke indu baka beranyam tikai ari tali plastik, nusuk leka manik nyadi tangu enggau kereban penganta buka, kelas nyumai enggau ngaga kuih asal sereta mayuh ke bukai.

“Enda tinggal mega kelas ngajat, betabuh, kuntau enggau pencha, bengkel nyimpai gendang, nero enggau ngelinsu terabai sereta nengkebang tepa bukai,” ku Ajat nerang silik.

Ku iya, sida endang nadai kala pungkang ngatur aktiviti ti udah dilangkar, diripih, ditimpuh lalu dipesetuju bala kaban sereta bisi ‘nembiak’ ngisi kelas tauka bengkel nya.

Ambika chunto ku iya, sida sebuat mujur ngatur bengkel ngaga terabai, tiga berenggat laban pengawa nya enda ulih tembu sekali lalu begunaka timpuh enggau pengepuh.

ALUS… Replika Gendang digaga bala kaban Serakup Ngasi Sarawak.

“Manah amat timbal ari bala kaban sentang pengawa tu ke alai bisi enam terabai ulih kami sebuat.

“Berengkah ari pengawa ngiga, nebang enggau nyayat kayu pelai dataika terabai tembu, bala kami endang besaup ngereja lalu nadai ngelakka pangan diri.

“Serakup enggau kerejasama baka tu dikedeka kitai lalu diterenak enggau diladan sida ke nembiak ngambi bebasaka kaul begulai enggau pangan diri, pengawa berat tau nyadi lempung, kereja tusah tau senang,” ku iya nampung.

Nangkan nya ku Ajat, serakup Ngasi Sarawak chukup betuah sereta benasip bisi sida ke tuai deka kiruh enggau meri sanding penemu ba semua atur pengawa.

“Kami bisi aya Sibat Manja ari Katibas di Song Kapit, ti landik enggau ulih nengkebang sereta nyadi pengajar ba kelas tabuh enggau gendang pampat.

DILEMPAI PENGANDAL…Kaban Komiti Serakup Ngasi Sarawak penggal 2019/2021.

“Aya tu mega landik ngambuh enggau nyepuh duku, ilang, nyabur enggau mata sangkuh sereta landik nyimpai ulu duku enggau gendang sereta ngukir terabai.

“Kami mega bisi aya Gerinang ari Lubok Antu enggau aya Sada Tinggak ari Gua, Sri Aman ti nyadi Mandal Presiden sereta aya Sibat ti nyadi Ketuai Komiti Bengkel.

“Kesemua sida tu bela ngembuan penau enggau pengelandik ti enda rangka penemu enggau bala bukai sereta chukup kemerah,” ku Ajat ngelansa.

Ngelansa sekeda pemujur udah dijapai serakup nya naka diatu baka menggi gelar Champion enggau Pemerindang Pemadu Manah ba Pekit Ngajat Theater Ensera Raja Langit di Auditorium Taza, IPG Kampus Batu Lintang 14 Disember 2016.

“Kami kala bulih dua kali gelar Champion enggau Pemerindang Pemadu Manah ba Pekit Gendang Pampat di SK Melugu Sri Aman kena 2017 enggau 2018.

SETIMBAL… Tabuh ngading ajat lekaki atas panggau.

“Kenang manis kami sebuat lebuh menggi gelar Champion enggau Pemerindang Pemadu Manah ba Pengawa Bejalai Bebala Mayuh Gawai Dayak Niti Daun Renggat Nengeri Sarawak di Water Front Kuching, 22 June 2018,” ku iya temegah.

Kelimpah ari nya ku Ajat, mayuh bengkah pengerami besai mujur diatur ari kaul rat sida ngatur pengawa ngangkatka main asal seraya nerenak pemereti ati begulai.

Terubah suba ku Ajat dikena sida nguji enggau ngeringka semengat ngatur pengerami besai iya nya Pengerami Mantar Gawai Dayak 2016 di DBNA, Kuching dipenyadi Menteri Muda Kaunsil Kandang Menua enggau Adun Marudi Datu Dr. Penguang Manggil.

“Udah nya kami nyau panjai agi singkang ngatur tiga bengkah pengerami dalam taun 2017, dipunka Pengerami Makai Lemai Ngintu Genap Taun Serakup Ngasi Sarawak Keterubah di Hotel Penview Kuching ti dipenyadika Adun Batu Kitang enggau Chairman Kaunsil Pelilih Pedawan IR Lo Khere Chiang.

“Malam Main Asal enggau Pemerindang di Julie’s Café UniCentral Samarahan udah dipenyadi Menteri Muda Nembiak enggau Lumba Datuk Snowdon Lawan kena 9 September 2019.

“Udah nya ditangkan Pengawa Ngelancharka Bengkel enggau Hari Nerima Penatai Mensia Mayuh Ngasi Sarawak ba palan besai serakup Ngasi Sarawak ti dipenyadika Menteri Muda Kaunsil Kandang Menua Datu Dr. Penguang Manggil kena 1 Disember 2017,” ku iya ngelansa pemujur pejalai pengawa sida ba taun 2017.

Serakup Ngasi Sarawak majak ngesaika bulu siga sida ngatur pengawa besai kena 19 Mei 2018 Bejadika Serakup Ngasi Sarawak sereta Bejadika Mantar Gawai 2018 di Crown Square Padungan Kuching dipenyadi Adun Bukit Begunan Datuk Mong Dagang.

Taun ti sama mega sida mujur ngatur Pengawa Nyuaka Setipikit enggau Hari Begempuru dipenyadi Ir Lo Khere Khiang di palan aktiviti serakup kena 8 September.

Pengerami Makai Lemai Ngenang Jasa enggau Mantar Gawai 2019 udah diatur kena 4 Mei di Crown Square ke alai Adun Batang Ai ti mega Menteri Muda Industri enggau Beranakka Puku, Malcom Mussen Lamoh dikangau datai nyadi ketuai pengabang lalu bejadika pengerami nya.

Ngelansa pasal sekeda perambu 2019 tu ku Ajat, besai juluk ati nampung pemujur pengawa ti udah nyengkaum Kelas Gendang Pampat Kohort 3, Kelas Ngajat Kohort 6, Bengkel Ngaga Tepa Replika Gendang diketuaika Tuai Sibat enggau Tuai Sada.

“Tu mega nyengkaum Pejalai Nemuai Gawa ngagai Opis Indu enggau Ruang Bilik Sarawak, Bengkel Ngaga Gagung enggau belatih Gendang Pampat, Ngajat enggau Tabuh kelimpah ari aktiviti main asal bukai,” ku Ajat nyimpul randau enggau Suara Sarawak.

Suara Sarawak