SARATOK: Pemajik tulin indu Iban, ulah ti siruka main asal enggau kreatif ngasuh endu Serena Tony endang patut menggi gelar Kumang Gawai Online 2021 Trofi YB Datuk Ali Biju.
Nerima undi 11,189 ari mensia mayuh ke alai kumang kitai taun tu mai pulai perais mata duit RM5,000, selampai enggau jumpang.
Gelar Lulong dipenggi Elyana Ricky ari Tuah Kanowit enggau undi 5,174 nerima RM4,000, selampai enggau jumpang. Iya dikerindu mensia mayuh laban chukup landik bepantun enggau nyendiaka rengka piring ba video kreatif.
Nerima 4,655 undi, Vanessa Lee ari menua benak pangka pasang menggi gelar Selinggar Matahari nerima RM3,000, selampai enggau jumpang. Ngepan iku dikena iya ngakun sereta mandangka pemanah raras tubuh.
Nambahka nya, tujuh iku pemekit ba renggat kepenudi bela nerima perais sagu ati RM1,000 siku.
Kaban Parlimen Saratok, Datuk Ali Biju meri pengaga ati ngagai semua bala pemekit lalu ngarapka semua sida ulih mekuhka adat enggau main asal Iban seriris enggau rambai jaku pekit nya.
