KUCHING: Kepala Menteri Datuk Patinggi Abang Johari Tun Openg deka mantaika gerah pasal guna kuasa hidrogen mayuh agi ba Sarawak dalam bulan tu.

Ku iya, bisi serikat korporat udah mantaika minat deka beranakka puku ngaul kuasa hidrogen di menua tu.

“Dunya diatu udah ngerembai ngagai guna kuasa hidrogen.

“Sebedau tu, siku pengelicha ari Universiti Kebangsaan Malaysia (UKM) datai betemu enggau aku minta penerang mayuh agi pasal hidrogen di Sarawak,” ku iya rambau bejadika Aum Besai Khas SUPP ditu, kemari.

Abang Johari nandu, IKM ngambi timpuh lima taun ungkup numbuhka prototaip nguna hidrogen tang Sarawak semina setaun aja ngaga prototaip nya.

“Nya entara pekara ti digaga kitai nuju teknologi gadung ngena sumber memua baka tekat hidro.

“Nya mega nyadi kelai tuju ekonomi kitai datai ba taun 2030 ila,” ku iya.

Berebak enggau nya, Abang Johari madahka sida dalam renggat ngubah baru chara pengerembai ekonomi ketegal pangka Covid-19 ngagai dagang.

“Kitai ngaga jalai alun enggau jematan ungkup muka sektor ekonomi enggau pekara betanam betupi di menua pesisir.

“Nya ngujungka aku sempat mai mutusikal ari Sibu ke Kapit dua minggu nyin kemari ti semina ngambi awak sejam 45 minit aja,” ku iya.

Tandu iya, nya pengeransing ati Perintah Sarawak deka ngubah Kapit nyentukka Nanga Mujong lalu nambahka sektor betanam betupi enggau pengelikun pemakai ba kandang menua nya.