DUNYA penganta suah ditemu kitai bekaul pemajik enggau penyigat gamal tang kebendar, dunya penganta tu ngembuan besai bungkur.

Ukai semina bekaul enggau penganta mua aja tang semua nya pasal pengeregas tubuh.

Kitai pen meseti ngembuan tubuh ti bepengerai laban nya kunchi ngagai pengeregas tubuh enggau nyadi kunchi lebuh kitai gawa.

Kati enda deh? Lebuh kitai sakit, tentu pedis kitai ngereja pengawa kelebih agi orang ti gawa beguna pengering enggau pengawa bejalai mindah.

Nya alai, mayuh orang ngiga tukang urut ti ulih mulaika pengeregas tubuh laban ti lelak gawa, kusut runding enggau ngambi tubuh nyamai.

Mayuh kitai meda servis ngurut orang ba media rama, semua mantaika penyelai diri enggau servis pemadu manah ari orang bukai kelimpah ngayanka peneleba sida ba pengawa ngurut tubuh tu.

Tang nya enda semua betul laban sekeda orang pandai agi beambi ulih lalu nguna peluang kitai ti benung sakit nya ngambi bulih penguntung.

PENGELEBIH DIBERI PETARA

Sekali tu, Suara Sarawak mai bala pemacha ngenang kisah siku indu ti diberi pemeri ari Tuhan pengudah iya megai pengarap Kristian iya nya pemeri nemu ngurut enggau nemu maut sarang anak.

Ngembuan mayuh peneleba ba dunya penganta, Serina Lagan, 43, enda nyangka diberi Tuhan pemeri nemu maut sarang anak sereta ngurut orang.

Indu Iban asal menua Niah tu madah, pengudah megai pengarap Kristian enda memukai iya nemu ngurut sereta maut sarang anak orang indu.

“Enda memukai aku diberi pemeri nya, berengkah ari nya meh aku bejalaika pengawa ngurut orang.

“Pengudah nemu pengelebih enggau pemeri nya, dia aku ngambi kus belajar urut ba Putri Sejinjang Spa di Kuching.

“Tuju aku ngambi kus tu dikena nambahka penemu ngambi semua pengawa enggau servis disedia aku enda dikenangi.

MINYAK URUT

“Tu mega sebagi ari chara aku nambah penemu lalu ngambi udah tu majak dikelala mensia mayuh kelebih agi sida ti ngira palan berurut,” ku iya lebuh dirandau, kemari.

Ku Serina, iya empu kebendar enda sedar tau nemu maut sarang anak laban ti semina ngaul diri ba dunya penganta sebedau nya.

“Diatu, kededua pengawa nya dikereja aku baka ngurut tubuh orang enggau maut sarang anak.

“Aku mega nemu ngurut tubuh nembiak mit ti baru ada, ngurut orang indu ti pedis deka kemi, ngurut orang indu ti pedis perut maya datai kain enggau ngatur urat,” ku iya.

Pengempu Sherryna Beauty tu madahka diri ngena sebansa minyak urut ti ditengkebang iya empu dikumbai ‘Blessing Oil’.

MAJAK DIKELALA

Ku iya, ‘Blessing Oil’ nya dikena ngemuntang pengawa maya ngurut orang.

“Blessing Oil’ tu digaga aku ari utai tumbuh baka minyak zaitun, bawang burak, lada enggau selali angi.

“Udah nya, minyak tu tadi disembiang aku ngena chara kitai Kristian.

“Kebuah pia laban ngambi minyak nya ditegu Tuhan lalu ulih nyuman semua leman penyakit ti nepan dalam tubuh kitai,” terang iya.

Diatu, Serina diau ba Bintulu, lalu iya sudah meri servis ngurut orang ba kandang menua nya, kelimpah suah dikangau ngusung Miri, Bekenu, Niah enggau Saratok.

“Aku meri servis mindah kin kitu, reti iya enti sema sida enda ulih datai ngusung rumah aku, aku ulih ngusung rumah sida.

“Nya kebuah servis aku laku, laban orang suah ngangau ke aku datai ngusung sida kelimpah minyak ti dikena aku ngurut tu ngasi ba sida,” ku iya.

BEMACHAM SERVIS

Iya madah baru, kelimpah Blessing Oil ti dijual ngena rega RM15 sebutul, Serina mega bejual stokin magnet ti diudar iya ari menua luar.

“Enti nitih mayuh servis disedia aku kelimpah ari ngurut tubuh enggau maut sarang anak.

“Tu nyengkaum servis betanggas, detox kaki, ngadu mua orang, nganta, ngurut mua, sulam ubung mua, nyambung bulu mata enggau ngadu bulu bansu.

“Taja pen aku napi mayuh penguji tang penyampau orang ti ngena servis tauka ti udah meli Blessing Oil meri aku peransang ti chukup positif kelebih agi lebuh timbal sida muji pemanah produk aku.

“Penyelai servis enggau produk aku ari orang bukai nya aku semina ngurut tubuh orang indu aja seraya ulih datai sebarang maya lebuh diguna,” ku iya.

Ku iya, taja pen penyampau orang ti besemekih ba servis penganta enggau pengawa ngurut majak mayuh, iya pechaya sereta nerima semua jereki nya datai ari Tuhan.

JEREKI

“Kitai meseti besemekih enggau chara ti manah, tiap iku kitai sigi bisi agih diberi Tuhan, nya ukai utai ti ngasuh aku irau ati.

“Naka diatu, orang ti ngena servis aku madah chukup tepantup ati, timbal ari sida chukup positif,” ku iya.

Serina meransang raban orang indu ti nadai pengawa tauka nyadi indu ngintu ruang bilik nguji belajar pengawa nyadi penganta, tukang urut enggau pengelandik bukai ti dikerindu sida.

“Sida mega ulih ngaul diri ba dunya dagang baka ngaga kasam ikan tauka beranyam laban semua nya ulih meri seraya nambah penatai pemisi ngagai kitai.

“Mayuh pengawa ulih dikereja kitai indu dikena mantu ruang bilik enggai ngiga belanja tambah.

“Semina aku deka mesan kitai orang indu anang malu tauka putus pengarap lebuh dituntung penguji dalam dagang,” ku iya.

JULUK ATI

Ku Serina, iya andalka dagang tauka pengawa iya ba dunya penganta enggau ngurut orang terus mujur.

“Aku keran deka ngasuh orang majak ngelala pengawa aku landik ngurut tu.

“Tu nentu ke mayuh bala orang indu badu ngenatka pemedis diri lebuh bisi tama angin dalam tubuh, pedis perut maya datai kain, pedis urat, pedis lengan enggau ulih beranak pengudah sarang anak sida dipaut.

“Aku mega gaga ulih mantu ngurut tubuh nembiak mit baka enti sema tubuh nembiak nya tama angin, pedis tinduk malam kelimpah ulih besampi ke sida jampat gerai,” ku iya.

Nya alai, mensia mayuh kelebih agi raban indu ti bisi pemedis baka nya tau berumban ngusung Serina ngambi tubuh gerai enggau regas bala selama.

Mensia mayuh ti deka nemu penerang silik pasal servis disediaka Serina tau ngelawa ruai Facebook iya, Christian Sapphire.

Kita mega tau betelefon terus ngagai iya nengah lumur, 0167091734.