Seriris ubah teknologi, tambahka penau teknikal

“Entara sukut ti patut diperati meseti ditambah agi iya nya pekara digital enggau perengka digital.”

KUCHING: Seriris enggau ubah ba pemansang teknologi, penau ba pemansang teknikal mega patut berubah sereta ditambah.

Kepala Menteri Datuk Patinggi Abang Johari Tun Openg madah penau ba teknikal meseti ditambah laban pemansang teknologi jeman diatu majak berubah ukai baka kelia.

“Teknologi udah berubah, nyadi penau teknikal patut diubah enggau ditambah.

“Entara sukut ti patut diperati meseti ditambah agi iya nya pekara digital enggau perengka digital,” ku iya.

Abang Johari bejaku munyi nya ba Pengerami Makai Lemai Injinir Institusyen Malaysia (IEM) Sarawak ba sebuah hotel tebilang ditu, ensanus.

Kelimpah ari nya, iya madah bala injinir endang beguna ba pemansang insfrastruktur menua.

“Penau bala injinir beguna amat dalam meri servis sereta pemansang insfrastruktur menua tu.

“Ukai semina injinir ba pemansang pekara sivil enggau elektrikal tang ba pekara automotif mega, kelebih agi diatu perintah bepun deka ngena bas hidrogen,” ku iya.

Iya nambah, laban perintah deka ngena Autonomus Rapid Transit (ART) penau bala ‘juru teknik’ enggau injinir endang beguna mega bejalaika pengawa tu ila.

“Perengkaguna mensia mayuh tu ila endang dikena deka napatka servis kita.

“Nya alai, Sarawak begunaka teknologi ti betul ba pemansang menua lebuh nuju ngagai pengelikun rampa menua enggau ekonomi digital,” ku iya.

Sama datai Sapit Kepala Menteri Tan Sri Datuk Amar Dr. James Jemut Masing.

TEPA…Datuk Patinggi Abang Johari Tun Openg (kanan) nerima tepa ari pengari Injinir Institusyen Malaysia (IEM) Sarawak ba sebuah hotel tebilang ditu, ensanus.-Gambar NADIM BOKHARI

Suara Sarawak