‘Service Sarawak’ dikerembai ke menua pesisir

MIRI: Palan Servis Penyangkai dikumbai ‘Service Sarawak’ deka dikerembai ngagai menua pesisir nentuka semua rayat ulih ngasaika perengkaguna ti disedia.

Kepala Menteri Datuk Patinggi Abang Johari Tun Openg madah, Kaunsil Multimedia Sarawak (SMA) diatu benung ngemanah tiang pemanchar ngambika rentayan komunikasyen disambung ba menua pesisir.

Abang Johari mansutka jaku nya lebuh dirandau pemberita pengudah bejadika Palan Servis Sarawak di Pusat Transformasi Bandar (UTC) ditu tadi.

“Ambika banding, sitak menua pesisir baka Long San, tiang pemanchar endang bisi tang kitai deka ngemanahka agi peneras rentayan nya.

“Enti rentayan tu udah disambung, kitai ulih nyambung Service Sarawak tu ngagai palan servis besemak,” terang iya.

Abang Johari madah, palan nya ulih meri pemaik ngagai semua rayat enggau syarat bisi internet ti deras.

Pia mega, Abang Johari madahka Service Sarawak nya servis ti diberi Perintah Sarawaj ngena teknologi iya nya penerang digital nengah sistem bungkur teknologi.

“Tu mega sebagi ari inisiatif ekonomi digital ke alai ejensi perintah enggau opis mega ulih ngena sistem ti sama dikena rayat enggau syarat bisi internet.

“Aku beratika mayuh servis perintah ulih digiga nengah pelasar tu,” terang iya ti gaga meda perengkaguna tu ulih dikena rayat ti ngelawa palan nya.

Sama datai Sekretari Perintah Sarawak Datuk Amar Jaul Samion, Speaker Kunsil Nengeri, Menteri Perengka Pengangkut Datuk Lee Kim Shin, Menteri Muda Dagang Temuai, Seni enggau Main Asal Datuk Sebastian Ting enggau Menteri Muda Orang Indu, Ruang Bilik enggau Pemansang Anak Mit Rosey Haji Yunus.

Suara Sarawak