Servis bank mindah kin kitu patut dikerembai mayuh

BETONG: Bungkur servis bank mindah kin kitu patut dikerembai mayuh agi lebih agi ngagai pasar mit tauka genturung pendiau ke langsung nadai ulih ngelawa bank.

Adun Saribas Mohammad Razi Sitam muji inisiatif Perintah Sarawak bekerejasama enggau sekeda bank dikena nulung rayat.

Taja pia, ku iya, agi mayuh pasar tauka genturung pendiau ke tusah ngulihka servis nya.

“Nya alai, aku chukup ngandalka Perintah Sarawak mansik baru dini pasar tauka genturung pendiau ke patut endur sida sangkai enggau nyendiaka servis bank mindah kin kitu nya.

“Ambika banding di Pasar Debak, servis bank mindah kin kitu kebendar alternatif ke patut bisi kelimpah ari nyendiaka pampang bank baka kiosk, tang agi bedau dipeda.

“Nya alai, lebuh rayat deka ngaduka pengawa ba bank sida nyau undur ke pasar
Betong, Saratok tauka Sarikei sereta ke bukai nyadi nya begunaka belanja ke besai laban jauh,” ku iya maya dirandau Suara Sarawak bekaul enggau servis bank mindah kin kitu nya, kemari.

Pia mega, rayat ba menua pesisir tentu gaga nyema servis bank mindah kin kitu nya ulih datai ba menua sida.

Razi mega madah, perengka guna nya bank nya kebendar beguna amat ba menua pesisir ba dunya ke majak ngerembai seriris enggau pemansang ekonomi.

“Kekadang, institusuen bank enggau muka pampang laban nangika rugi.

“Tang, enti diperati enggau silik ari sukut pengerembai ekonomi enggau penyampau rayat ke majak nambah, aku ngasaika institusyen wang ulih untung…pia mega, tu ulih mantu perintah ngemuntangka pengawa ngatur rayat,” ku iya.

Suara Sarawak